Киирии

Киирии

Өлүөнэ өрүһү туоратар күргэни тутууга икки дьоппуон хампаанньата «Мицуи» уонна «Комаихалтек Инк» интэриэстээхтэрин биллэрбиттэр. «Мицуи» бырайыактыыр департаменын салайааччы Коносукэ Суги дьоппуон салалтатыттан үбүнэн көмөнү ыларга эрэллээхтэрин биллэрбит.

Саха сирин бырабыыталыстыбатын бэрэссэдээтэлин бастакы солбуйааччы Алексей Колодезников «Мицуи» хампаанньа бэрэстэбиитэллэрин кытары көрсүбүт. Көрсүһүүгэ Өлүөнэ өрүскэ күргэни тутуу уонна бииргэ үлэлэһии туһунан кэпсэттилэр. Маны таһынан, билигин Тиксиигэ тыал генераторын тута сылдьар «Комаихалтек Инк» хампаанньа күргэни тутууга интэриэстээҕин биллэрбит.

“Биһиги Япония экэниэмикэтин, эргиэн уонна бырамыысыланнас миниистириттэн күргэни тутууну чинчийиигэ, бырайыактыырга уонна симиэтэнин эҥин оҥорорго үп-харчы көрдүөхпүтүн баҕарабыт”, — диэтэ тойон Коносукэ Суги.

Маныаха кини Саха сирин өттүттэн араас дааннайдар наада буолуохтарын (күргэ хайдах буолуохтааҕа, тутуу болдьоҕо уо.д.а.) туһунан тоһоҕолоон эттэ. Колодезников күргэ Саха сиригэр эрэ буолбакка, Арассыыйа хотугулуу-илиҥҥи өттүгэр сүҥкэн суолталааҕын бэлиэтээн туран, дьопуоннар көрдүүр дааннайдара болдьоҕор бэриллиэхтэрэ диэн эрэннэрдэ “күргэни тутуу биһиэхэ тыын боппуруоспут буолар, инньэ гынан туох-хайа иннинэ түргэн соҕустук олоххо киллэрэ сатыырга дьулуһабыт. Бырайыактыыр докумуоннары кыра кэмҥэ бүтэрэн баран, 2019 сылга номнуо тутууну саҕалаан барыахпытын наада” диэтэ.

От ыйын 20-21 күннэригэр Дьокуускайга Өлүөнэ өрүскэ күргэни тутууга норуоттар икки ардыларынааҕы кэмпириэнсийэ буолуоҕа. Онно «Комаихалтек Инк» уонна «Мицуи» хампаанньалар кыттыахтара.

Тарҕат:

Ырытыыгын суруй

Защитный код
Обновить

Бүтэһик сонуннар