Киирии

Киирии

Оччотооҕу сайылык оҕолоро мустан, пиэрмэ ыарахан үлэтигэр олохторун анаабыт төрөппүттэрбит үлэтин үйэтитэр сыалтан «Сайылык оҕолоро» түмсүүнү ааспыт күһүн тэриммиппит. Бары да төрөппүттэрбитин кытта тэҥҥэ үлэлээн, илии-атах буолан, тыа үлэтин эппитинэн-хааммытынан билэн улааппыппыт. Дьоммут биир өрөбүл күнэ, уоппуската суох ыарахан үлэҕэ сылдьыбыттара. Чахчы да үлэҕэ бэриниилээх, тулуурдаах, дьулуурдаах, сайылыгы кытта ыкса сибээстээх көлүөнэ дьон кинилэр буолаллар.

От ыйын 7 күнүгэр Илин Баска «Сайылык – оҕо сааһым ааспат ахтылҕана» тэрээһиммит бэрт сэргэхтик ааста. Буолар сирин эрдэттэн ыраастаан, хомуйан, киэргэтэн тоһуйдубут. 10 ч. саҕалаан үөрбүт-көппүт, сүргэлэрэ биллэ көтөҕүллүбүт бэтэрээннэр, сайылыкка олорбут дьон, ыччат, кырачаан оҕолор, балтараа сүүсчэҕэ чугаһыыр киһи муһунна. Дьокуускайтан, Томпоттон, Тааттаттан тиийэ ох курдук оҥостон кэлбиттэрэ – саҕалаабыт бырайыакпыт кэскиллээҕин кэрэһилээтэ.

Ыҥырыылаах ыалдьыттар «Кинилэр эти-үүтү дэлэтиигэ үлэлэспиттэрэ» диэн В.Н. Протодьяконов-Кулантай аатынан литэрэтиирэ түмэлин анал быыстапкатын педагогика үлэтин бэтэрээнэ, СӨ Култууратын үтүөлээх үлэһитэ К.Г. Бурцева киһи эрэ сэргиир гына сиһилии кэпсээбитин сэҥээрэ иһиттилэр. Тэрээһин Сэргэ Уйбаан алгыһыттан саҕаланна. Ол кэнниттэн Екатерина Свинобоева туруоруутугар «Санаабар, бу илэ көһүннэ...» тыйаатырдыы дьүһүйүүтүн көрөн, ол түгэҥҥэ дьоллоох оҕо сааспыт сылаас өйдөбүлэ бу баардыы тиллэн, санаалыын сырдаатыбыт, дууһалыын уоскуйдубут.

Общее

1-кы Хоро нэһилиэгин баһылыгын солбуйааччы В.В. Гуляев истиҥник эҕэрдэлээн туран, үлэ бэтэрээнэ А.А. Тролуковаҕа – «Улуус социальнай-экэнэмиичэскэй сайдыытыгар кылаатын иһин» бэлиэни, үлэ бэтэрээнэ А.С. Бурцеваҕа – «Нэһилиэк социальнай-экэнэмиичэскэй сайдыытыгар кылаатын иһин» бэлиэни, ону тэҥэ бочуоттаах сынньалаҥҥа олорор бэтэрээннэргэ улуус, нэһилиэк Бочуоттаах кырааматаларын, махтал суруктарын туттарбытын дохсун ытыс тыаһа доҕуһуоллаата. Сал­гыы дьиэ-кэр­гэнин аатыттан аҕа­тыгар, өр кэм уу таһар массыы­наҕа үлэлээбит, В.Д. Гуляевка бириис туттарда. Уус Алдан ТХУтун начаалынньыгын солбуйааччы В.В. Гуляев үлэ бэтэрээнэ К.М. Орловаҕа – «Улуус тыатын хаһаайыстыбатын сайдыытыгар кылаатын иһин» бэлиэни, бочуоттаах сынньалаҥҥа олорор бэтэрээннэргэ ТХУ Бочуоттаах кыраамататын, махтал суругун туттарда. Нэһилиэк дьокутаата Г.М. Ефимов илиититтэн сцена бэтэрээннэрэ Култуура управлениетын кыраамататын, махтал суруктарын туттулар.

Эмиэ бу күн ытыктыыр-убаастыыр, үлэ үөһүгэр сылдьыбыт ыанньыксыттарбытыгар – К.М. Орловаҕа, А.А. Тролуковаҕа, Т.Д. Макееваҕа – үөрдэ-көтүтэ «Сайылык Далбар Хотуна» ааты иҥэрэн, анал лиэнтэ, ааттара суруллубут чорооннору туттардыбыт, барҕа махтал тылларын эттибит. Барахсаттарбыт олус диэн үөрдүлэр, долгуйдулар. Билигин биһиги кэккэбитигэр суох буолбут төрөппүттэрбитин, аймахтарбытын уонна 64-65 саастарын ааспыт, үлэ үтүмэнин үлэлээбит 10 бэтэрээммитин (К.М. Орлова, А.А. Тролукова, Т.Д. Макеева, М.Г. Стручкова, Д.В. Николаева, О.П. Атласова, А.С. Бурцева, А.А. Сергеева, М.Д. Орлов, И.М. Сергеев) чиэстээн Бочуот кинигэтигэр киллэрдибит. Биригэдьииринэн үлэлээбит М.Г. Стручкова 70 сааһынан эҕэрдэлээн Эҕэрдэ сурук, сувенир туттардыбыт. Хотон үлэтигэр таһаарыылаахтык үлэлээбит М.Е. Макеев, К.В. Бурцева, Р.В. Федорова, Н.П.Находкина, И.И. Кривошапкин, А.М. Бурцев, В.П. Находкин, дьоммутун үйэтиппит С.П. Бочкарев, билигин сайылыктаан олорор Н.Н. Бечеканов уонна үөрүүбүтүн үллэстэ кэлбит саамай саастаах сайылык оҕолоро Эҕэрдэ суругу кытта «Сайылык оҕолоро» сувенир туттулар.

Ми

Сцена бэтэрээннэрэ А.Тролукова, М.Орлов, Н.Бурцев, Н.Свинобоева, эдэр кэскиллээх ырыаһыттар – С.Охлопкова, Т.Румянцева, Р.Копырина, Г.Кривошапкин, Р.Кривошапкин, сайылык оҕолоро, сиэннэрэ кыттыылаах истиҥ-иһирэх кэнсиэр буолла. Салгыы интэриэһинэй күрэхтэри көрдүбүт. Ол курдук, «Сайылык кыыһа-Удьуор утума-2018» кыайыылааҕынан Саина Бурцева, «Сайылык үтүө-мааны Хотуна-2018» диэн 60-тан аҕа саастаахтар күрэхтэригэр – Т.Д. Макеева, «Сайылык Эр Хоһууна-2018» – А.Макеев буоллулар. «Сайылыкпар тиэрдэр суолунан» марафон биллэ сэргэхситтэ. Кыттааччылар – 40-тан аҕа саастаах 33 киһи – оҕо саастарыгар түһэн, тапталлаах сайылыктарын иилии сүүрэн кэллилэр. Манна дьахталларга – А.С. Бурцева, эр дьоҥҥо – В.М. Сергеев эдэрдэртэн хаалсыбакка сүүрэн, бары да сөхтүбүт-махтайдыбыт. Саамай ыһыылаах-хаһыылаах көрдөөх күрэх эстафета буолла. Манна 8-тыы киһилээх «Кыймаласпыт», «Илин Бас» уонна бэтэрээннэр хамаандалара илин-кэлин түһүстэ. «Илин Бас» хамаанда кыайыылаах тахсан, көһөрүллэ сылдьар Куубагынан уонна түөскэ кэтиллэр мэтээлинэн наҕараадаланнылар.

Кэрэхсэбиллээҕэ, бу күрэхтэргэ сайылык оҕолоро төрөппүттэрин аатынан бириистэри туруоран, тапталлаах дьоннорун аатын үйэтиппиттэрэ буолар.

Кинилэри таһынан «ИП Бочкарев С.П.», «ИП Корнилов Е.Г.», «ИП Григорьева В.В.», «ИП Яковлев В.Г.» успуонсардаан олус диэн үөрдүбүт, махталбытын тиэрдэбит.

Бу курдук сир аайы сайылык оҕо­лоро түмсэн, оҕо саастарын санаан, төрөппүттэрин үтүө аатын үйэтитэр, сэргэх уонна туһалаах тэрээһиннэри ыыталлара үтүө үгэскэ кубулуйуо диэн эрэнэбит.

С.М. Бурцева, түмсүү салайааччыта.

Тарҕат:

Комментарии

Защитный код Обновить