“АЛРОСА” авиа-хампаанньа сыл бастакы аҥаарыгар 9 %-ынан элбэх пассажиры таста

«АЛРОСА» авиа-хампаанньа 2018 сыл бастакы аҥаарынааҕы үлэтин түмүгүн таһаарда. Тохсунньу – бэс ыйдарга хампаанньа өҥөтүнэн 199,1 тыһ. пассажир туһанан, ааспыт сыл туһааннаах кэмигэр тэҥнээтэххэ, 9 бырыһыанынан элбэх киһи айаннаата. Былырыын баччаларга 181,2 тыһ. пассажир көппүтэ.

Тэрилтэ генеральнай дириэктэрэ Андрей Гулов быһаарбытынан, пассажир элбээһинэ Саха сиригэр үлэлиир ньиэп хампаанньаларын сайаапкатынан көтөр эриэйсэ эбиллибититтэн таҕыста.

Сыл инники алта ыйыгар авиа-хампаанньа, анал ыйыынан оҥоһуллар авиацияны аахпакка туран, уопсайа 1 132 эриэйсэни оҥорбут. Итинтэн 860-на – киин араспысаанньанан, онтон ордубут 277 эриэйсэтэ – сакааһынан. Салгын суудунатын бары көрүҥнэрэ, уопсайынан, көппүт чаастара 12,1 тыһ. чаас, сөмөлүөт туолуута, ортотунан, 77,1%. Ону таһынан авиа-хампаанньа 3,5 тыһ. т тиийэ уопсай уонна буоста таһаҕаһын тиэйбит.

 «Ыам уонна бэс ыйдарга биһиги сайыҥҥы араспысаанньанан куруортаах Симферополь, Анапа, Сочи, Геленджик, Доннааҕы Ростов куораттарга Новосибирскайтан, Санкт-Петербуртан, Томскайтан, Новокузнецкайтан, Кемеровоттан, ону тэҥэ Домодедовоттан көтүүлэри саҕалаатыбыт. Мииринэйтэн уонна Полярнайтан Москубаҕа уонна Новосибирскайга көтөр эриэйсэлэри эбэн биэрдибит. Ону таһынан 2018 сыл бэс ыйыттан Новосибирскай--Благовещенскай--Новосибирскай уонна Домодедово—Иркутскай--Домодедово хайысхаларынан саҥа эриэйсэлэри олохтоотубут», -- диэн авиа-хампаанньа сыл бастакы аҥаарынааҕы үлэтин түмүгүн А. Гулов билиһиннэрдэ.

 Ыспыраапка:

«АЛРОСА авиа-хампаанньа» АУо – Саха сиригэр эрэгийиэн иһинээҕи уонна Арассыыйаҕа тиһиги быспакка көтөр уонна чартернай сырыылары оҥорорун таһынан СНГ, Азия уонна Европа норуоттар икки ардыларынааҕы чартер көтүүлэри оҥорор, таһаҕаһы тиэйэр уонна авиация анал үлэлэрин оҥорор Арассыыйа ави-хампаанньата. Күн бүгүн авиа-хампаанньа 12 араас 42 салгын суудуналаах. О.и. пассажирдары таһар үс Boeing-737-800 сөмөлүөттээх.

Маны таһынан тэрилтэ Мииринэй, Полрянай, Айхал уонна Ленскэй аэропортарыгар салгын суудуналарын сиргэ хааччыйар үлэлээх. Бу авиа-хампаанньа АЛРОСА салаа тэрилтэтэ Мииринэйдээҕи авиа-тэрилтэ (МАП) базатыгар тэриллибитэ, 2013 сыл тохсунньу 1 күнүттэн туһунан юридическай сирэй быһыытынан үлэлиир.