Хара сарсыардаттан Мииринэй куорат уулуссаларыгар уот кыhыл эбэтэр күөх сэлиэттээх тиэргэни сиппийээччилэр куорат уулуссаларын, искибиэрдэрин ыраастыыллар. Бөхтөөх ууруналар, тимир баахтар кураанахтаналлар, сибэккилээх кулуумбалар сыыс оттон ыраастаналлар. Хаһан да бүтэн быстыбат үлэ баhа-атаҕа биллибэт курдук.
Куораппыт Дьокуускайы кытары холоотоххо быдан ыраас. Тоҕо диэтэххэ, дворник аармыйата Мииринэйгэ тобус-толору. “Дворник үлэтин көрдүүбүн” диир биллэрии Мииринэй «МирОКбиз» саайтыгар сотору-сотору көстөр. Онон сылыктаатахха, тиэргэни сиппийээччи үлэтин да булар уустугурбут. «МПЖХ» уонна «Коммунальщик» ДЬУоХХ тэрилтэлэрэ урут гражданскай уонна быраап сөбүлэҥин чэрчитинэн, территорияны ыраастааһыҥҥа оробуочайдары үлэҕэ харыыта суох ылыталыыллар этэ. Билигин клининг уонна аутсорсинг ньымата киирэн, куораты ыраастааһын дьыалатын икки бэдэрээччит тэрилтэтэ ыллылар. Олорго үлэ мэлигир. Үлэни талымаһа суох Орто Азия дьоно тутатына үллэстэн тураллар. Билигин, сиппийээччи үлэтэ былдьаhыгар, ыраах дойдулартан кэлбит дьон үмүөрүhүүлэрэ быhаччы дьайда. Бу үлэни атырдьах ыйыгар кэлии дьон былдьаhа-тарыһа ылыталаан, билигин Мииринэйгэ «хара үлэ» боппуруоhа биллэ уустугурда. Yлэни тиксэрээччилэр сорохторо олохтоох дьоҥҥо баар бэрээдэгинэн хамнаһы төлөөмөөрү (биэнсийэ, нолуок, страховка, больничнай, уоппуска) кэччэйэллэрэ саарбахтаммат. Оттон соҕуруу дойду ыччаттара 27 тыhыынча солк. иhин уулуссалары, тэрилтэлэр тэлгэһэлэрин туох да хамнастарыгар эбиискэтэ, бириэмийэтэ суох сиппийэргэ улгумнар. Сарсыардаттан сиппийэллэр, күнүһүн ырыынакка эргинэллэр, эбиэттэн киэhэ – холтууралыыллар, түүннэри таксыылыыллар эбэтэр быстах үлэлэри толороллор. Туох да диэбит иһин, кымырдаҕас курдук хамсаналлар. Сылайбаттарыттан сөҕөбүн. Ыраах сиртэн кэлбит ыалдьыттар кылгас кэмҥэ өлөрбyт хамнастарын соло буллулар да дойдуларыгар ыыталыы тураллар. “Маладьыастар, бу сүрэхтэрин-бэлэстэрин” эрэ диибин. Арай бу дьон дойдуларыгар экэниэмикэлэрэ тупсан, үлэ булуталаан, күргүөмүнэн хайыһардаан хааллахтарына Мииринэй бөххө көмүллэр дуо?
Мин, түптээн үлэ булбакка сылдьар, анал идэтийиилэрэ суох саха дьонун Мииринэйгэ үлэлии кэлэлэллэригэр аҕытаассыйалаабытым ыраатта. Ханнык баҕарар үлэҕэ. Сиппийээччи да буоллун. Инньэ урукку ПЭТСиЖХ тиэргэни сиппийээччилэргэ уопсайдарга хос биэртэлиир кэмин саҕана. Ким эрэ син сэргээбитэ буолбута, ким эрэ дуоннаахха да уурбатах буолуохтаах. Ол эрэн, букатын халтай буолбатах. Интэриэhиргээбиттэр, сэргээбиттэр Мииринэйгэ оннуларын булуохча буоллулар. Кэлиэх кэллэ, барыах барда. Оттон билигин да үлэ боппуруоһа уустук.Нэhирэн олорон хаалыыбыт түмүгэр, оннооҕор тиэргэни сиппийээччи үлэтэ дьэпписиит буолан хаалла.
Станислав Алексеев, Мииринэй куорат.
