Арассыыйаҕа дьон дохуота үрдүө диэн эрэнэ кэтэһэллэр эрээри, дьадаҥы ахсаана күн-түүн хаҥыы турар. Ол туһунан Госдуума мунньаҕар Ааҕар-суоттуур балаата салайааччыта Алексей Кудрин эппитин “Интерфакс” суруйар.
“Билигин Арассыыйаҕа 19,3 мөл. дьадаҥы киһи баар. Ол эбэтэр нэһилиэнньэ 13,2 %-на олох олоруу алын кээмэйиттэн кыра дохуоту аахсар”, -- диир тойон Кудрин. Кини этэринэн, 2017 с. түмүгүнэн биэнсийэ 3,6 %-нан үрдээбит эрээри, кэлиҥҥи икки сылга биэнсийэлээхтэр дохуоттара 3,7 %-нан көҕүрээбит.
