Быйыл хортуоппуй үүнүүтэ өрөспүүбүлүкэ үрдүнэн куһаҕана суох, сорох сиргэ үүнүү олус үчүгэй дииллэр. Онон иккис килиэп тэҥэ суолталаах аспытын быстарыга суох хааччынарга эрэл улахан.
“Туймаада-Агроснаб” ААУо ыскылаатыгар бу күннэргэ үлэ күөстүү оргуйар. Ыскылааттарга сүүһүнэн туонна хортуоппуй хайыр курдук кыстаммытын суортуу, тала, араара сылдьаллар. Маныаха ханна, хаһан уонна төһө барыахтааҕа эмиэ былааннанар.
Холобур, хортуоппуй кэккэ өлүүскэтэ, өрүү да буоларын курдук, хотугу уонна Арктика улуустарыгар – салгын аалынан, сороҕо кыһын суол турдаҕына, массыынанан тиэрдиллиэ. Ону сэргэ Дьокуускай куораты сиир хортуоппуйунан, сиэмэ хортуоппуйунан хааччыйаллар.
Манна даҕатан эттэххэ, хоту улуустарга быйыл холбоон 663 т оҕуруот аһа тиэрдиллиэхтээҕэ былааннаммыт эбит. Итинтэн уу суолунан – 550 т, салгын суолунан 113 т тиэрдиллиэхтээх.
Ол курдук, уу суола баарын баттаһа Арктика уонна хоту улуустарга “Туймаада-Агроснаб” хортуоппуйу “Мальчиков” уонна “Магдебург” рефрижератордарынан ыытар. Билигин тиһэх эриэйсэлэрин оҥоро сылдьаллар.
Тиэрдиллэрэ былааннаммыт 550,5 туонна оҕуруот аһыттан 347 туонната – хортуоппуй. Кэнники чахчыларынан, Үрүҥ Хайа бөһүөлэгэр 65 т оҕуруот аһа тиэрдиллэрэ хаалбыт. Оттон Орто Халымаҕа тиксиэхтээх 71 т оҕуруот аһыттан хортуоппуйа – 56 т.
Оттон көтөр аалынан тиэрдиллиэхтээҕи этэр буоллахха, былааннаммыт 24 эриэйсэттэн нэдиэлэ саҕаланыыта 8 эриэйсэ оҥоһуллубут этэ. Ол эбэтэр, билиҥҥитэ 44,59 т оҕуруот аһа миэстэтигэр тиэрдиллэн турар. Итинтэн “иккис килиэбэ” -- 33,37 т. Ол аата, былаан туолуута – 39,46 % этэ. Хаһыат атыыга тахсар кэмигэр бу сыыппаралар уларыйбыт буолуохтарын сөп.
Өрөспүүбүлүкэ үрдүнэн оҕуруот аһын хаһаанар муҥутуур улахан ыскылаат, билэргит курдук, «Туймаада-Агроснаб» ААУо бас билиитигэр, туһаныытыгар сылдьар. Бу тутууга 5 000 т оҕуруот аһа киирэр кыахтаах. Онон хортуоппуй эрэ буолбакка, атын оҕуруот астара эмиэ сөбүгэр уһун кэмҥэ буортуйбакка харайыллар усулуобуйалара оҥоһуллубут. Ол быһыытынан ыскылаат иһинээҕи тэмпэрэтиирэ сылы эргиччи +2-4 кыраадыска тутуу ирдэнэр. Онуоха анал салгыннатар тиһик баара туһалыыр.
Соторутааҕыта тустаах ыскылаакка, норуокка тарҕаммытынан “пятитысячникка” ТХМ Сири оҥорууга, мелиорацияҕа уонна материальнай тэхиниичэскэй хааччыйыыга департаменын салайааччыта Василий Чичигинаров бара сылдьан, үөскээбит балаһыанньаны, туох үлэ-хамнас ыытылларын билсибитэ. Быйыл Өлүөхүмэ хортуоппуйун хаачыстыбата үчүгэй диэн буолла. Онон хаалбыт сүрүн сорук хоту уонна Арктика улуустарыгар сыранан кэлбит үүнүүн кэмигэр уонна туругун мөлтөппөккө илдьии буолар.
Улуустартан хаачыстыбалаах хортуоппуйу Дьокуускайга тоҥоруу иннинэ, оруобуна кэмигэр, аҕалбыттар. Өлүөхүмэттэн “Туймаада-Агроснаб” быйыл 1200 т аҕалбыт: «Олекмаагропродукт» ЗСХПК – 500 т, “Саҥыйахтаахтан” – 700 т.
