Бу күннэргэ киин куоракка миграция сокуонун кэһэн, өрөспүүбүлүкэҕэ тас дойдуттан кэлэн, көҥүлэ суох олорооччулары көрдөөн булар түүҥҥү эриэйдэ буолла. Омук гражданнара олоруон сөптөөх дьиэлэрин, түүҥҥү кулууптары, уопсастыбаннай ас тэрилтэлэрин, кафелары, эрэстэрээннэри бэрэбиэркэлээбиттэр.
Полиция үлэһиттэрэ бу сырыы кэмигэр 72 омук гражданин булбуттар. Ол түмүгэр РФ миграцияҕа сокуонун эйгэтигэр административнай быраабы кэһии 27 түбэлтэтэ көстүбүт. 17 омук киһитигэр Арассыыйаҕа киирии быраабылатын эбэтэр дойдуга олоруу эрэсиимин кэспитин иһин, административнай боротокуол толоруллубут. Сэттэ боротокуол миграция учуотугар турууга сымыйа сибидиэнньэни биэрии иһин буолбут. Оттон үс боротокуол РФ Административнай быраабы кэһии туһунан кодекс ыстатыйаларын кэспиттэргэ толоруллубут. Ол эбэтэр, өрөспүүбүлүкэҕэ баҕарбытынан кэлэ-бара сылдьыы, сокуону кэһии уодьуганнанар.
