Керчкэ буолбут быһылаан кэннэ М.К. Аммосов аат. Хотугулуу-Илиҥҥи федеральнай университекка куттал суох буолуутугар эбии миэрэлэри ыллылар. Аны университет эбийиэктэрин күнүстэри-түүннэри харабыллыыр буолуохтара. Ол туһунан ХИФУ Куттал суох буолуутугар, гражданскай оборуонаҕа уонна ыксаллаах быһыыга-майгыга управлениетын салайааччы Дмитрий Солопов кэпсиир.
“ХИФУ үөрэнэр куорпустарыгар уонна уопсайдарыгар эбии анал харабыллыыр тэрилтэлэри ыҥыран үлэлэтэр туһунан быһаарыы ылынныбыт. Өскөтүн урут анал тэрилтэ үөрэх кыһаларын күнүһүн, оттон уопсайдары түүнүн эрэр харабыллыыр буоллаҕына, алтынньыттан саҕалаан күнүстэри-түүннэри көрөр-истэр буолуохтара”, – диир Д.Солопов.
Университет пресс-сулууспата иһитиннэрэринэн, анал тэрилтэлэри таһынан буруйу бохсуу профилактикатыгар иллэҥ кэмнэригэр көхтөөх устудьуоннары кыттыахтара.
Санаттахха, ааспыт нэдиэлэҕэ Керчь куорат политехническай колледжыгар Владислав Росляков диэн устудьуон үөрэнэ сылдьар оҕолору киирэн саанан ытыалаабыта, буомбаны дэлби тэптэрбитэ. Ол содулугар барыта 21 киһи өлбүтэ – 16 үөрэнээччи уонна 5 колледж үлэһитэ.
