Мииринэй куорат аэропорда 2018 сыл үс кыбартааллааҕы үлэтин түмүгүн таһаарда. Ол курдук, тохсунньу – балаҕан ыйдарыгар тустаах аэропорт уопсайа кэлэр-барар 4 649 эриэйсэни хааччыйда. Аэропорт өҥөтүнэн туһанааччы ахсаана ааспыт 2017 сыл туһааннаах кэмигэр холоотоххо, 3 бырыһыанынан эбиллэн, 259,6 тыһ. тэҥнэспит. Ону таһынан сыл тоҕус ыйыгар бу аэропуорт 387,4 туонны почтаны уонна 5 840 туонна таһаҕаһы аһарбыт.
Мииринэйдээҕи авиа-тэрилтэ (МАП) хамандыыра, Мииринэй аэропордун эпэрээтэрэ Валерьян Веретенников бу билигин аэропорт кыһыҥҥы бириэмэҕэ үлэлииргэ бэлэмэ түмүктэнэн эрэрин иһитиннэрдэ. Көтөр аал түһэр-тахсар балаһатын туһааннаах усулуобуйаҕа эппиэттэһэр гына бэлэмнээбиттэр, аэродрому кыһын үлэлэтэргэ, салгын аалларын хааччыйарга туттуллар анал тиэхиньикэ уонна оборудование үлэҕэ бэлэмин сыныйан бэрэбиэркэлээбиттэр.
Мииринэй аэропордун маршруттарын ситимэ бу үс кыбаартал устата уларыйбатах. Аэропорт быһа көтүүлэри оҥорор куораттара билигин 13. Ол иһигэр Москуба, Санкт-Петербург, Краснодар, Доннааҕы Ростов, Геленджик, Екатеринбург уонна Новосибирскай бааллар. Билиҥҥи туругунан куруук көтөр (регулярнай), баахта чартернай уонна таһаҕаһы тиэйэр чартернай таһыыларга Мииринэйи кытта уопсайа 7 авиа-хампаанньа үлэлэһэр.
