Ааспыт нэдиэлэҕэ тыа сирин дьахталларын Аан дойдутааҕы күнүгэр сыһыаран, Т/х-тын министиэристибэтин мунньахтыыр саалатыгар бэрт сэргэх тэрээһин буолан ааста. Манна куорат уонна өрөспүүбүлүкэ 16 улууһуттан 62 кэрэ аҥаар ыҥырыллан, көхтөөхтүк кытынна. Ол иһигэр, ыраах Дьааҥыттан, Орто Халыматтан, Сунтаартан, Ньубраттан...
Үлэни, уопсастыбаннай үлэни өрө туппут, тыа сирин көхтөөх, үлэһит дьахталларыгар анаан сэминээрдэр, маастар-кылаастар, өрөспүүбүлүкэ биллэр-көстөр үлэлээх тэрилтэлэрин үлэтин-хамнаһын кытта билиһиннэрии тэриллэн ыытыллыбыта.
Т/х-тын миниистирин бастакы солбуйааччы Татьяна Осипова “СӨ т/х-тын сайдыытыгар дьахталлар хамсатар күүс буолаллар” диэн ис хоһоонноох дакылаатын истибиттэрэ. Кини онно тыа сирин үлэһит үтүөтэ, салайааччы бастыҥа дьахталлара өрөспүүбүлүкэ социальнай-экэнэмиичэскэй сайдыытыгар киллэрбит кылааттарын анаан бэлиэтээбитэ. Ол курдук, т/х-тын устуоруйатыгар ааттара көмүс буукубанан суруллубут Социалистыы үлэ дьоруойдара Елизавета Бурцева, Анастасия Копырина, Варвара Трофимова, Мария Аммосова, Матрена Корнилова, Анна Васильева, Екатерина Новгородова сырдык ааттара үйэлэргэ умнуллубат. Кинилэр оҥорбут дьыалаларын салҕаабыт, сорохторо күн бүгүн да үлэ үөһүгэр сылдьар биллиилээх кэрэ аҥаардары Парасковья Федорованы, Аграфена Сутакованы, Таисия Десяткинаны, Ариада Маркованы, Елена Тутукарованы уо.д.а. бу бэлиэ тэрээһиҥҥэ сыһыаран анаан ааттаан, санатан ааһар тоҕоостоох.
Күн бүгүн өрөспүүбүлүкэ агро-бырамыысыланнай холбоһугар т/х-тын тэрилтэтин салайааччынан 286 дьахтар үлэлиир. Кинилэртэн 180-на - үрдүк үөрэхтээх, 53-һэ - орто анал үөрэхтээх.
Т/х-тын исписэлииһэ 411 нэһилиэккэ баар эбит буоллаҕына, онтон 60-тан тахса бырыһыана – дьахталлар.
Саха сирин үрдүнэн бигэтик үлэлиир 2 654 бааһынай хаһаайыстыбата баар, итинтэн 1 112 хаһаайыстыбаны дьахтар аймах салайан үлэлэтэр. Олор истэригэр 3 уонна онтон элбэх оҕолоох ийэ - 800-тэн тахса.
* Бааһынай (фермер) хаһаайыстыбаларын салайааччыларыттан 583 киһи үрдүк үөрэхтээҕиттэн, дьахтара – 215, аграрнай үөрэхтээҕэ – 184, орто анал үөрэхтээҕэ – 486, итинтэн аграрнай хайысхаҕа үөрэммитэ – 126.
Тэрээһин чэрчитинэн, “Т/х-тын бастыҥ салайааччы дьахталлара” кинигэ сүрэхтэниитэ буолла. Бу кинигэҕэ таһаарыылаахтык үлэлиир хаһаайыстыба салайааччылара Таисия Десяткина, Ариада Маркова, Анастасия Кырбасова уонна Елена Тутукарова тустарынан суруллубут.
