“Арассыыйа улуу ааттара” Бүтүн Арассыыйатааҕы бырайыак чэрчитинэн ыытыллар Дьокуускай аэропордун аатын талар интэриниэт-куоластааһын түмүктэнэрэ чугаһаата.
Санаттахха, аан бастаан испииһэккэ уон киһи аата киирбитэ. Ол иһигэр сынаайпар Ф.Попов, саха төрдө Эллэй Боотур, судаарыстыбаннай-бэлиитичэскэй диэйэтэл А.Аржаков, сахаттан бастакы дьахтар-лүөччүк В.Захарова, олимпиец Р.Дмитриев уо.д.а. бааллара. Ол эрээри түмүктүүр куоластааҥҥа саамай элбэх куолаһы ылбыт Былатыан Ойуунускай, Михаил Николаев, Петр Бекетов уонна Валерий Кузьмин киирбиттэр. Дьиҥэр, түмүк куоластааһыҥҥа үс киһи киириэхтээх этэ эрээри, сорох дьон тэҥ куолаһы ыланнар, хандьыдааттар түөрт буолбуттар.
Түмүктүүр куоластааһын сэтинньи 12-30 күннэригэр ыыталлар. Бу кэм устата Арассыыйа ханнык баҕарар олохтооҕо “ВеликиеИмена.рф” саайка киирэн эбэтэр 8-800-707-93-17 нүөмэргэ эрийэн куоластыан сөп. Барыллаан түмүгү күн аайы Москуба бириэмэтинэн күнүс 12 чааска үөһэ ыйыллыбыт саайка таһааран иһиэхтэрэ. Кыайыылаах аата ахсынньы 5 күнүгэр биллиэ.
