Биһиги былырыын саас “Хатан” сурунаал 10 сылыгар аналлаах тэрээһиҥҥэ сылдьан, ситиһиилээхтик кыттан, лааҕырга сынньанар путевка тутан олус үөрбүппүт.
Сэтинньи 14-27 күннэригэр «Сосновый бор» лааҕырга сынньанан кэллибит. Биһиги оскуолаттан Стас Варламов, Эдик Егоров, Федя Захаров, Ангелина Рожина, Альмира Варламова буолан сырыттыбыт. Барыта 6 академия баарыттан биһиги 1-гы академия этибит. Академиябыт аата «Феникс» диэн. Хас күн аайы араас тэрээһин буолар, бэйэ-бэйэбит икки ардыгар хорга, караокеҕа, үҥкүүгэ, фотозона оҥоруутугар күрэхтэспиппит. Биһиги фотозонаҕа бастакы миэстэни ылбыппыт. Күн аайы мэтэнэбит, чэбдигирэбит, уруһуй, муусука, физкультура уруоктарыгар сылдьабыт. Аспыт олус минньигэс, тотоойу этэ. Биһигини кытта оҕо барыта сөбүлээн истэр ырыаһыта Кролик Бро кэлэн көрсөн ыллаан барбыта. Лааҕыр бары үлэһиттэригэр кыһамньыларын иһин махтанабыт.
“Хатан” сурунаалбыт эрэдээктэрэ Е.Р. Николаевка олохпутугар умнуллубат түгэни бэлэхтээбитин иһин барҕа махталбытын биллэрэбит. Оҕолорго туһаайан этэбит: сахалыы тылынан тахсар сурунаалбытыгар “Хатаҥҥа” суруйтарыаҕыҥ уонна кини баар буоларын туһугар үлэлиэҕиҥ диэн. Элбэхтик ааҕыҥ, суруйуҥ.
Гаврил Васильевич Егоров аатынан
Хара Алдан орто оскуолата,
Таатта
