Киирии

Киирии

Чурапчы улууһугар ыытыллыбыт бизнес-форумҥа 12 улуустан 200 тахса оҥорон таһаарар урбаанньыттар кыттыыны ыллылар.

Тэрийээччилэр: “Чурапчы улууһа” муниципальнай тэриллии дьаһалтата, СӨ Урбаан, атыы-эргиэн уонна тиризим министиэристибэтэ, СӨ Урбааны өйүүр киин, СӨ тыа хаһаайыстыбатын уонна кэпэрэтииптэрин ассоциацията.

Форумҥа олохтоох оҥорон таһаарааччылар бородууксуйаларын быыстапката турда. Манна эт, үүт бородууксуйата, бурдук астар, сувенирдар, миэбэллэр уо.д.а. көрдөрүлүннэ.

Ону таһынан, баҕалаах дьон баан, нолуок үлэһиттэриттэн сүбэ-ама ыллылар.

Форум чэрчитинэн ситэриилээх былаас уорганнарын, общественнай түмсүүлэр уонна урбаан сайдыытын институттарын бэрэстэбиитэллэрэ кыттыылаах араас дьыалабыай тэрээһиннэр ыытылыннылар.

Тыа хаһаайыстыбатын табаарын оҥорон таһаарар урбааньыттар, тыа хаһаайыстыбатын миниистирин солбуйааччы Николай Афанасьевы кытта төгүрүк остуолга тоҕоостоох боппуруостары дьүүллэстилэр. Үгүстэр сир учаастагын куортамнааһын туһунан боппуруоһу ыйыттылар. Ону таһынан, агропромышленнай комплексы судаарыстыбаннай өйөөһүн, нолуок төлөбүрүгэр уларыйыылар, 2019 сылга дьиэ кэргэн фермердэрин өйөөһүн, «Меркурий» бэйэтэ үлэлиир систиэмэни киллэрии уонна тыа хаһаайыстыбатын кооперативтарын үлэтигэр бааһынай-фермерскэй хаһаайыстыбалар кыттыыларын туһунан боппуруостары дьүүллэстилэр.

Иккис төгүрүк остуолга урбааны сайыннарыы өрөспүүбүлүкэтээҕи институттарын бэрэстэбиитэллэрэ судаарыстыбаннай өйөбүл ис тутулун билиһиннэрдилэр. СӨ Урбаан, атыы-эргиэн уонна тиризим министиэристибэтин миниистири солбуйааччы Максим Прокопьев, министиэристибэ үлэтин сүрүн хайысхаларын кэпсээтэ. Эрэгийиэннээҕи лизинговай хампаанньа генеральнай дириэктэрэ Татьяна Бравина, оҥорон таһаарар тэриллэри хайдах табыгастаах усулуобуйаҕа иэс ылыахха сөбүн туһунан быһаарда. Урбааны сайыннарыы пуонда бэрэстэбиитэлэ Захар Нехоруков кирэдьииттээһин туһунан кэпсээтэ. СӨ Урбааны өйүүр киин генеральнай дириэктэрэ Зоя Седалищева, кыра уонна орто урбаан өрөспүүбүлүкэтээҕи портал үлэтин сырдатта. Бизнес-инкубатор генеральнай дириэктэрэ Максим Карбушев, оройуоннарга Бизнес-инкубатор ситимин үлэтин сырдатта.

«Focuspro» консалтинговай киин дириэктэрэ Дьулустан Иванов, сыананы хайдах быһар, чэпчэтии, акция ыытар туһунан кэпсээтэ.

Урбаанньыт Наталья Иванова торт оҥорууга маастар-кылаас ыытта. Манна араас улуустартан 12 кондитер аныгы, ураты торду астыырга үөрэннилэр.

Форум түмүгүнэн “Чурапчы улууһа” муниципальнай тэриллии уонна СӨ эрэгийиэннээҕи лизинговай хампаанньа бииргэ үлэлиир туһунан илии баттастылар.

Форум бу сылга ыытыллыбыт 10-с тэрээһин буолар. Аммаҕа, Намҥа, Горнайга, Хаҥаласка, Мэҥэ-Хаҥаласка, Ленскэйгэ, Дьааҥыга, Өлөөҥҥө, Булуҥҥа уонна Анаабырга бизнес-форум ыытыллыбыта.

Тарҕат:

Комментарии

KennethPrick
0 KennethPrick 03.12.2018 22:55
купить втз 30сш

трактор с бульдозерным отвалом
Ответить

Защитный код Обновить