Киирии

Киирии

Мииринэй оройуонун кырыыба сиригэр, сүрүннээн эбэҥки дьоно түөлбэлээн олорор Сүлдьүкээр сэлиэнньэтигэр, эбэтэр, сурукка киирэринэн "Садын национальнай эбэҥки нэһилиэгэр" оскуола төрүттэммитэ 90 сылын туолар. 


Көһө сылдьар, таба ыстаадаларын дьаһайар, ыраах тыаҕа бултуур-балыктыыр бырангаат-эбэҥкилэрин оҕолорун биир сиргэ мунньан үөрэтэр  ылбычча кыаллыбат сорук этэ.  
Сэбиэскэй былаас олохтонуутун кэнниттэн, эбэҥкилэри биир түөлбэҕэ мунньан олордуу булгуччулаах бэрээдэгэ киллэриллибитэ. Оччолорго Улуу Тоҕо диэн ааттаах  табаһыттар учаастактара бүтүн дэриэбинэҕэ кубулуйбута.

syl5
"Кыһыл ыллык" уонна "Кыһыл Север" холкуостар тэриллибиттэрэ.Түөрт кылаастаах оскуола тэриллибит кэминэн 1928 сыл буолар. Сыыйа-баайа, эбэҥкилэри биир сиргэ мунньууну сэбиэскэй былаас кытаанахтык модьуйбута. Тайҕаҕа көһө сылдьар дьон,  дэриэбинэҕэ олохсуйан, табаларын эһитэлээн барбыттара. Онтон аны былаас дьаһалынан, Улуу Тоҕо дэриэбинэтин атын дьоҕус түөлбэҕэ – Сүлдьүкээргэ көһөрүү барбыта.Ону кытары алын кылаас оскуолата биир бастакынан көһөрүллүбүтэ. 

syl2
60-с сылларга, Улуу Тоҕо ГЭС тутуллуутунан сибээстээн  Бүлүү муоратыгар тимирдиллибитэ. Дьон Сүлдьүкээргэ олохсуйуталаан, дьиэ, социальнай эбийиэк арааһа туттуллан барбыта. Сол кэмнэргэ тутуллубут Сүлдьүкээр оскуолата  билигин да сулууспалыы турар. Мииринэй оройуона Сүлдьүкээргэ нэһилиэнньэ аҕыйаҕар сигэнэн, саҥа оскуоланы тутары булгуччулааҕынан аахпатаҕа.Итинтэн да сиэттэрэн, уонунан сыллар тухары  эргэ оскуола хас да төгүл абырахтанан, өрөмүөннэнэн күн бүгүнүгэр диэри кэллэ. 
Бүтэһик өрөмүөн 2015 сыллаахха бүтэн быстыбакка, оҕолор хойутаан үөрэнэ кэлбиттэрэ.

syl4

 

Ол туһунан уонна бу иннинэ Сүлдьүкээр элбэх кыһалҕаларын суруйан, матырыйаал ааптара, Мииринэй оройуонун  саамай көйгөтүтүллүбүт нэһилиэгин,  Саха сирин бырабыытылыстыбатын, Ил Түмэн  болҕомтотугар тириэрдэри ситиспитэ.
Ахсынньы 21-22 күннэригэр Сүлдьүкээр орто оскуолата   90 сыллаах үбүлүөйүн үөрүүлээх быһыыга-майгыга бэлиэтиэҕэ.  Үбүлүөй чэрчитинэн төгүрүк остуол, оскуола устун уонна түмэлгэ экскурсия, "Күөх уот" кэнсиэр, "Көрдөөх стартар", үҥкүү-битии уо.д.а. тэрээһиннэр былааннаналлар. Сүлдьүкээрдэр "Бу кэмҥэ  уоппут эрэ барбата буоллар" диэн баҕа санаалаахтар. Санатан эттэхпинэ, Бүлүү ГЭСин  ыксатыгар олорор нэһилиэк,  уота-күөһэ сатаҕай, сотору-сотору быстарыктыыр.

syl3
2013 сылга, Данилка учаастагар  уот лиинньийэтигэр баһаар күүдэпчилэнэн,  диисэл ыстаансыйаланан,  өр баҕайы эрэйдээхтик олорбуттара.
Ол да буоллар, Сүлдьүкээр дьоно санааларын түһэрбэттэриттэн, ханнык да ыарахан түгэҥҥэ тулуурдаахтарыттан сөҕөбүн.
Нэһилиэктэригэр бэриниилээхтэр. 
Оскуолаларын урут да, хойут да бүтэрбиттэр олуһун диэн ытыктыыллар, таптыыллар.

Станислав Алексеев, Мииринэй куората. 

Тарҕат:

Комментарии

Защитный код Обновить