Ахсынньы 12 күнүгэр Уус-Алдан улууһун Найахы нэһилиэгэр, 16 км массыына суолун учаастагын үөрүүлээх аһыллыыта буолла.
“Дүпсэ — Балыктаах хайысханан массыына суола саҥалыы оҥоһуллубута нэһилиэк сайдарыгар улахан кыах биэриэ”, — диэн СӨ Тыраанспар уонна суол хаһаайыстыбатын миниистирин бастакы солбуйааччы Сергей Владимиров СИА-ҕа иһитиннэрдэ.
Бу суол тыа сирин сайыннарыы федеральнай бырагыраамма иһинэн, биир тутуу кэмигэр оҥоһулунна.
“Биһиги өрөспүүбүлүкэ салалтатыгар, тыраанспар уонна суол хаһаайыстыбатын министиэристбэтигэр, кылгас кэм иһигэр суолу тутан үлэҕэ киллэрбиттэригэр улаханнык махтанабыт. Бүгүҥҥү күн бүтүн улуус уонна нэһилиэк олоҕор ордук улахан суолталанна. Найахы нэһилиэгэ тыа хаһаайыстыбатын сайдыытын биир сүрүн тирэҕэ буолар. Биһиэхэ тыа хаһаайыстыбатын оҥорон таһаарар кэпэрэтиибэ үлэлиир. Ол курдук, үрүҥ ас арааһын, бакыаттаах бородууксуйалары оҥорон таһаарабыт. Онон, саҥа суол сайдыы саҕахтарын арыйыа турдаҕа”, — диэн Уус-Алдан баһылыга Алексей Федотов бэлиэтээтэ.
Найахы нэһилиэгин Балыктаах бөһүөлэгэ улуус кииниттэн 83 км тэйиччи сытар. Нэһилиэнньэ ахсаана 931 киһи. Олохтоохтор ордук тыа хаһаайыстыбатынан дьарыктаналлар. Уопсайа 1226 төбө сүөһү, олортон 437 ыанар ынах уонна 720 сыспай сиэллээх ааҕыллар.
