Войти

Войти

Ахсынньы 23 күнүгэр Дьокуускай куорат 203-с түөлбэтигэр, “Айыы кыһата” оскуола 550 миэстэлээх саҥа дьиэтин күүтүүлээх аһыллыыта буолан ааста. Үөрүүлээх тэрээһиҥҥэ Ил Дархан Айсен Николаев ыалдьыттаата.

“Саха тылыгар үөрэтэр оскуолалар элбии тураллара киһини үөрдэр. Номнуо 32 оскуола буолла. Үүнэр көлүөнэ маннык үөрэх кыһаларыгар уһуйулуннаҕына, төрүт култууратын үчүгэйдик билэр буолуоҕа”, – диэн Айсен Николаев эҕэрдэ тылыгар эттэ.

Бу оскуолаҕа 203-с түөлбэҕэ олорор оҕолор нууччалыы уонна сахалыы тылынан үөрэниэхтэрэ. Урут үөрэнэ сылдьыбыт оҕолору эмиэ ылыахтара. Хас биирдии кылаас интерактивнай дуосканан, көмпүүтэринэн хааччыллыбыт.

Санатабыт, “Айыы кыһата” оскуола 2005 сыллаахтан, Дьокуускайдааҕы национальнай гимназия иһинэн оҕо Дыбарыаһыгар үлэлээн саҕалаабыта. Бастаан  оскуола саҥа дьиэтэ 47-с кыбаарталга тутулларын туһунан сурах барбыта. Оттон 2015 сыллаахха саҥа 203-с түөлбэҕэ тутулларын туһунан быһаарыллыбыта.

“Оскуолабыт саҥа дьиэтэ тутулларын 13 сыл күүттүбүт. 2018 сыл бүтүүтэ  саҥа дьиэҕэ киирэн малааһынныыр туһунан истэммит олус үөрбүппүт. Үөрэнээччилэр оскуолаҕа бэҕэһээ эрэ бастакытын киирбиттэрэ. Саҥа кылаастары көрөн үөрүүлэриттэн долгуйан ылбыттара”, – диэн оскуола дириэктэрэ  Лидия Шамаева үөрэ кэпсиир.

“Айыы кыһата” оскуола куорат биир ордук бөдөҥ уонна кэрэ көстүүлээх дьиэтэ буолла. Дьокуускайга уопсайа 12 социальнай эбийиэк үлэҕэ киирэрэ былааннанар. Бу – оскуолалар, уһуйааннар уонна кутуура дьиэлэрэ. Оттон өрөспүүбүлүкэ үрдүнэн инники сылларга 27 саҥа эбийиэк ааннарын аһыахтара.

Тарҕат:

Комментарии

Защитный код Обновить