Ил Түмэҥҥэ 6-с №-дээх биир мандааттаах быыбардыыр учаастактан быйыл талыллыбыт норуот дьокутаата, “Ситим” медиа-бөлөх генеральнай дириэктэрэ Мария Христофорова Губин уул. 37 №гэр турар уопсай дьиэ кырачааннарын, олохтоохторун көрсөн эҕэрдэлээтэ.
Бу уопсай дьиэ 1983 сыллаахха тутуллан киирбитэ уонна өрүс пуордун үлэһиттэригэр анаммыта. Билигин биэс этээстэх дьиэ төһө да эргэрдэр, олохтоохтор көмөлөрүнэн тупсаҕай көрүҥнээх: подъезд иһэ ыраас, сырдык, быйыл кырааскаланан саҥардыллыбыт. Дьиэ ыстаарастата Наталья Дмитриевна Сивцева дьиэ хара тутуллуоҕуттан олорор. Кини такайыытынан, сүүрэн-көтөн олохтоохтор бары биир иллээх дьиэ кэргэн курдук олороллор. Үһүс этээскэ элбэх оҕо олорор буолан, манна Саҥа дьылааҕы харыйа турбут, кырачааннар уруһуйдара, оҥоһуктара эркиҥҥэ ыйаммыт.
Наталья Сивцева, дьиэ ыстаарастата:
-- Бу сыллар тухары биһиги дьиэбитигэр аанньа ахтан биир да дьокутаат үктэммэтэҕэ. Оттон бу Саҥа дьылааҕы бырааһынньык иннинэ, биһиги талан ылбыт дьокутааппыт Мария Христофорова илэ бэйэтинэн кэлэн эҕэрдэлээбитэ, болҕомтотун уурбута биһигини, олохтоохтору олус үөрдэр. Мария Николаевнаҕа кыһамньыҥ иһин барҕа махталбытын тиэрдэбит!
Мария Христофорова олохтоохтору кытары долгутар боппуруостарын тула кэпсэттэ, кинилэргэ кыах баарынан көмөлөһүөм диэн эрэннэрдэ. Оттон кырачааннар Саҥа дьылааҕы хоһооннорун доргуччу аахтылар уонна Тымныы Моруос ыыппыт минньигэс бэлэҕин тутан үөрдүлэр-көттүлэр. Аны эһиил үөрэххэ, үлэҕэ ситиһиилэммит оҕолор улахан чиэскэ тиксиэхтэрэ, онон кыттааталларыгар ис сүрэҕиттэн баҕарда.
Салгыы Мария Николаевна Губинскай уокурук аатыттан куораттааҕы дума дьокутаатын Владислав Дмитриевы кытта, “Солнечный мир” диэн доруобуйаларыгар хааччахтаах оҕолор айар талааннарын сайыннарар кииҥҥэ ыалдьыттаатылар. Оҕолор тымныы күнү аахсыбакка бары мустан, ыалдьыттарга бэйэлэрин билиһиннэрдилэр уонна Саҥа дьыллааҕы үҥкүү бэлэхтээтилэр.
Бу киин туһунан кылгастык билиһиннэрэр буоллахха маннык: 2008 сыллаахха “Дети Саха-Азия” пуонда уонна Оҕо (подростковай) киин көҕүлээһиннэринэн тэриллибит. Киин иһинэн “Ил-Дэгэй” диэн инклюзивнай үҥкүү бөлөҕө номнуо сэттис сылын үлэлиир эбит. Манна 80-тан тахса оҕо дьарыктанар. Олортон 20 доруобуйаларыгар хааччахтаах оҕолор.
Салайааччы Арина Васильева хас биирдии оҕоҕо ийэлии истиҥ сыһыанын биэрэн туран үлэлиирэ тута харахха быраҕыллар. Оҕолор Дьокуускай куоракка ыытыллар араас тэрээһиннэргэ көхтөөхтүк кытталлар. Ону таһынан, өрөспүүбүлүкэтээҕи уонна Аан дойдутааҕы таһымнаах күрэстэргэ кыттан кырата суох ситиһиилээхтэр.
Ол курдук, Москуба куоракка ыытыллыбыт норуоттар икки ардыларынааҕы “Открытая Европа” бэстибээлгэ “Гран-при” аатын ылбыттар. Ону таһынан, Санкт-Петербург куоракка буолбут бүтүн Арассыыйатааҕы “Будущее планеты” бэстибээл I, II истиэпэннээх лауреаттара. Ити курдук, кырачаан үҥкүүһүттэр ситиһиилэрин киһи ааҕан сиппэт.
Бөлөххө дьарыктанар оҕолор үҥкүүлүүллэрин таһынан үтүө үгэстээхтэр: тыйаатырдарга, циркэҕэ, мусуойдарга сылдьаллар, Саҥа дьыл бырааһынньыгын, төрөөбүт күннэри бииргэ ылаллар уонна ордук айылҕаҕа сылдьалларын сөбүлүүллэр эбит. Ураты оҕолору кытта үлэлиир биллэн турар ыарахаттардаах. Манна төрөппүттэр күүс-көмө буолаллара саарбаҕа суох. Кинилэр көхтөөх буоланнар эдэр салайааччы бастакы саҕалааһыннарын куруук өйүүллэр.
Мария Николаевна уонна Владислав Дмитриев кэлэн иһэр Саҥа дьылынан эҕэрдэлээн туран оҕолорго минньигэс бэлэхтэри туттардылар. Кырачааннар олус үөрдүлэр, сэргэхсийдилэр. Оттон киин үлэһиттэрэ уонна төрөппүттэр ыалдьыттарга махтал тылларын эттилэр.
