Ил Дархан Айсен Николаев 17 оҕолоох Котогоровтар дьиэ кэргэни кэлэн иһэр Саҥа дьыл бырааһынньыгынан эҕэрдэлээтэ.
Котогоровтар Мархаҕа чааһынай дьиэҕэ олороллор. Кинилэр биэс бэйэлэрин оҕолорун кытта 12 иитиэх оҕолоохтор. Олортон икки оҕо ыал буолан туспа олороллор.
2007 сыллаахха “Элбэх оҕолоох дьиэ кэргэн” аатын ылбыттара. Ол саҕана икки бэйэлэрин оҕолорун таһынан түөрт иитиэх оҕолоох этилэр.
Төрөппүттэр оҕолорун кыра эрдэхтэриттэн эппиэтинэстээх, бэйэ-бэйэлэригэр көмөлөсүһэ сылдьалларыгар, чугас дьонноругар убаастабыллаахтык сыһыаннаһалларыгар үөрэтэллэр. Ыал ийэтэ Аксана Николаевна былырыыҥҥыттан тэлгэһэлэрин иһигэр дьоҕус зоопарка тэринэн үлэлээн эрэллэрин туһунан кэпсээтэ. Манна хоруолук, енот, саһыл, таба, канада бөрөтө уо.д.а. бааллар. Кыыллары көрөргө оҕолор күүс-көмө буолаллар эбит.
Оҕолор Айсен Сергеевичка үөрэхтэригэр ситиһиилэрин, сөбүлүүр дьарыктарын туһунан кэпсээтилэр. Уруһуйдарын, илиилэринэн оҥорбут оҥоһуктарын уонна муспут куукулаларын көрдөрдүлэр. Алта саастаах Рома Фурсо бэрэсидьиэн буолуон баҕарарын эттэ. Улахан кыыстара Виктория Котогорова олунньу ыйга аһымал кэнсиэр тэрийэрин туһунан кэпсээтэ. Бу кини дипломнай үлэтэ буолар. Култуура уонна ускуустуба колледжын бүтэрээри сылдьар.
Айсен Николаев элбэх оҕолоох ыалы Саҥа дьылынан эҕэрдэлээтэ уонна тэлэбиисэр, минньигэс бэлэхтэрин туттарда. Үүнэр сылга ситиһиилэри, дьолу баҕарда.
