Киирии

Киирии

Дьокуускай куорат 35-с №-дээх оскуолатын үөрэнээччилэрэ үүнэр сылы оскуола саҥа дьиэтигэр көрсүөхтэрэ.

Бу үөрэх кыһатын уратыта диэн, манна доруобуйаларыгар хааччахтаах оҕолор үөрэнэллэр. Онон, саҥа оскуолаҕа кэлээскэлээх оҕолор холкутук сылдьалларыгар аналлаах пандустар, лифт үлэлиир. Ону таһынан, көрүдүөрэ, ааннарын көҥдөйө киэҥэ-куоҥа   оҕолор киирэллэригэ-тахсалларыгар табыгатаах.

Саҥа үс мэндиэмэннээх, 275 миэстэлээх оскуола 23 кыбаарталга Тургенев аатынан уулуссаҕа турар. Уопсай иэнэ 7 тыһ кв м. Манна спортивнай, мунньахтыыр сааллар, остолобуой таһынан ууну ыраастыыр систиэмэлээх бассейн баар.

Оскуола саҥа дьиэтэ туттулларыгар бастаан сир боппуруоһа хааччахтаабыта. Оттон өрөспүүбүлүкэтээҕи бүддьүөттэн үп тиийбэтэҕэ. Кэлин федеральнай бүддьүөттэн үбүлэнэн тутуу үлэтэ түмүктэннэ.

Санатабыт, ааспыт сайын бэс ыйыгар РФ Уһук-Илин сайдыытын миниистирэ Александр Козлов Дьокуускайга сырыытыгар, Ил Дархан Айсен Николаев тутуу үлэтин билиһиннэрбитэ. Миниистир федеральнай бүддьүөттэн үп көрүллэрин ситиһэргэ эрэннэрбитэ. Түмүккэ өрөспүүбүлүкэ федеральнай бүддьүөттэн 1,7 млрд солк субсидия ылбыта. Бу үп 35 №-дээх оскуола, Хандыгаҕа элбэх профиллаах гимназия саҥа дьиэлэрин, Орто Халымаҕа спортивнай саала тутуутугар, Нерюнгри куоракка оҕо поликлиникатын уонна ОДьХХ дьиэлэрин өрөмүөнүгэр тыырылынна.

Билигин 35-с оскуолаҕа 435 оҕо орто оскуола   бырагыраамматынан үөрэнэллэр. Дьокуускайга маннык инклюзивнай оскуола саҥа киэҥ-куоҥ, сырдык дьиэлэммитэ өрөспүүбүлүкэ олохтоохторугар күүтүүлээх бэлэх буолар.

Тарҕат:

Комментарии

Защитный код Обновить