Киирии

Киирии

Ахсынньы 27 күнүгэр Чурапчы улууһун Хайахсытыгар уонна Мэҥэ-Хаҥалас Бүтэйдээҕэр айылҕа гааһын күөх төлөнө умайда.

 “Биһиэхэ гааһы ахсынньы 25 күнүгэр холбообуттара. Дьиэбит тута биллэрдик сылыйбыта. Урут чоҕунан оттор эрдэхпитинэ маннык ичигэс буолбат этэ. Аны чох быылын киһи этэ да барбат. Ордук ийэбит Маргарита Павловна олус үөрдэ. Гааска  ас түргэнник буһар. Онон бары өттүнэн табыгастаах”, – диэн үлэ бэтэрээнэ, Туора-Күөл олохтооҕо Иван Иванович Филиппов санаатын үллэстэр. Хайахсыкка 24 дьиэ гааска холбонно. Атыттарга 100% гаас турбалара киирэн бэлэм тураллар.

Мэҥэ-Хаҥалас улууһун Бүтэйдээх нэһилиэгин олохтоохторо эмиэ ыра санаалара туолан үөрүүлэрэ үксээтэ.  “Гааска холбоммут учууталларым олус астына сылдьаллар. Оскуола үлэһиттэрэ киэһэ хойут “сойбут” дьиэҕэ тиийэллэр буоллаҕа дии. Билигин сып-сылаас дьиэҕэ тиийэр олус үчүгэй. Онон биһиэхэ олох атын олох саҕаланна диэхпин баҕарабын. Дьон дьиэлэрин толору хааччыллыылаах оҥостуохтара, саҥа дьиэлэри туттуохтара уонна ыччат куоракка талаһара аҕыйыа этэ дии саныыбын. Биһиэхэ Интэриниэт ситимэ түргэн, сибээс үчүгэй. Онон олохтоохтор бары уонна оскуола, интернат дьиэлэрэ гааска холбонорбутун күүтэбит”, — диэн оскуола дириэктэрэ Туйаара Пономарева кэпсиир.

Айылҕа гааһын күөх төлөнүн уматыыга кыттыыны ыллылар: СӨ Бырабыыталыстыбатын бэрэссэдээтэлин бастакы солбуйааччы Алексей Колодезников, промышленность уонна геология миниистирэ Максим Терещенко, “Ил Түмэн” дьокутааттара Михаил Гуляев, Юрий Баишев, Александр Гоголев, Павел Ксенофонтов, муниципальнай тэриллиилэр баһылыктара Андрей Ноговицын, Николай Старостин, тыа хаһаайыстыбатын министиэристибэтин бэрэстэбиитэллэрэ уонна “Сахатранснефтегаз” генеральнай дириэктэрэ Иван Макаров уонна үлэһиттэр.   Бу күн гаас үлэһиттэригэр махтал тыллар этилиннилэр уонна наҕараадалар туттарылыннылар. Олохтоохтор олус истиҥ кэнсиэр көрдөрдүлэр.

Тарҕат:

Комментарии

Защитный код Обновить

Бүтэһик сонуннар