Соторутааҕыта биһиэхэ “Саха” НКИК “Ферма-2, Дьол тааһа” диэн биэриитигэр санаатын Хаҥалас Нөмүгүтүттэн А. Иванова диэн көрөөччү санаатын үллэстэн бу курдук ис хоһоонноох сурук ыытта:
“Ферма-2, Дьол тааһа”диэн “реалити-шоу” буолан бүттэ. Ону, арааһа, сөбүлээн көрбүт киһи элбэҕэ буолуо. Сунтаар туһунан сурах эрэ хоту истэр-билэр дьон маны көрөн аҥаардас шоу кыттыылаахтарын эрэ буолбакка, бу улуус үтүө айылҕатын, кэрэ миэстэлэрин, Кэмпэндээйи-Сунтаар дьоно киэн туттар сирдэрин тэҥҥэ билиситибит. Ыытааччылар ис киирбэхтик кэпсииллэрэ, күрэхтэһиини ыыталлара наһаа үөртэ. Ордук М.Кобельянова- Тускулаананы чорбото туттум. Куолаһа, тутта-хапта сылдьара, холкута, кэпсиирэ, кыттааччыларга сыһыана барыта киһини тардар. Бэрт кылгас кэрчик да кэмҥэ бэйэтин улууһун таптыыра, билэрэ, аҕыйах тылынан саамай сүнньүн булан этэрэ сөхтөрдө. Итини көрөн Сахабыт да сиригэр киһини тардар күрэхтэһиилээх шоуну оҥоруохха сөп эбит диэн түмүккэ кэлэҕин. Тэлэбиидэнньэ сорох сериалларын киһи иккистээн көрүөх санаата кэлбэт буоллаҕына, “Дьол тааһын” үөрэ-көтө көрөҕүн. Арай, аатын “Таас сайылыкка -- Дьол тааһа” диэбиттэрэ буоллар ордук буолуох эбит. Холобур, мин бу биэриини былырыын буолбут ферма кыргыттарын кытта бутуйа санаабытым. Сунтаардар биэриилэрэ буоларын хантан билиэхпиний?! Бырайыак өр толкуйдаммыта биллэр, ону күрэхтэһиилэр да туоһулууллар. Бу тэрээһин кистэлэҥ ис соруга суорумньу эбит. Кырдьык, бу бырайыак уоллаах кыыс билсиһиитэ буолбакка, хамаандалар улахан бириис иһин күрэхтэһиилэрин курдук этэ. Суорумньуга биир күнүнэн аҥаардарын булуналлар, оттон онно 7 күн — үөһэттэн бэлэх!
Биһиэхэ, көрөөччүлэргэ, олус үчүгэй шоуну бэлэхтээбит Сунтаар тэлэбиидэнньэтин үлэһиттэригэр, онно кыттыбыт хорсун эдэр дьоҥҥо барҕа махталбын тиэрдэбин. Ылсыбыккыт ыпсыылаах, үлэҕит таһаарыылаах, тус олоххутугар дьоллоох, бөҕө доруобуйалаах буолуҥ!
Кэнники кэмҥэ саха тэлэбиидэнньэтигэр маннык сэргэх биэриилэр тахсаллара олус үчүгэй. Кэнэҕэһин өссө сайдан, тупсан иһиэхтэрэ диэн саарбахтаабаппыт. Сунтаар ТВ бырайыага Саха сирин үрдүнэн улахан биһирэбили ылла. Ол да иһин уһун өрөбүллэргэ киин канаалбытыгар көстөн бар дьону күөх экран тула түмтэ.
Бырайыак ааптара Мария Кобельянова – Тускулаана:
— Тэрээһин түмүгүнэн Сунтаар аата ааттанна, ыччаты тыа хаһаайыстыбатыгар, тыа сирин үтүө үгэстэригэр иитии-үөрэтии үлэтэ ыытылынна, ону таһынан кыттааччылары билиһиннэрэн умнуллубат түгэннэри бэлэхтээтэ. Билигин бырайыак кыайыылаахтара Мария уонна Илья Вьетнамҥа сынньана сылдьаллар, кинилэри кытта Анна, Вилюя баҕаларынан барсыбыттара олус үөрдэр. Маннык бырайыактар элбээн саха дьонун кэрэҕэ угуйдуннар!
Санатар буоллахха, кыайыылаахтарга “Саха” НКИК 50 тыһ. солк. путевканы туттарбыта.
