Сэргэлээх аттыгар 2 гектар иэннээх үүнэр көлүөнэ парката тутуллара былааннанар. Тохсунньу 23 күнүгэр бырайыак архитектуратын оҥорууга бүтүн Арассыыйатааҕы аһаҕас күрэс түмүгэ тахсыа.
“Күрэскэ үрдүк таһымнаах идэтийбит үлэһиттэр кытталлар. Финалистар саха архитектордарын кытта бииргэ үлэлииллэр. Бу кинилэр сайдыыларыгар үчүгэй тирэх буолар. Финал түмүгүнэн бастыҥ дизайнаах бырайыагы быһаарыахпыт. Кыайыылааҕы кытта кини бырайыагын олоххо киллэрэр хантараак түһэрсиэхпит”, — диэн СӨ сүрүн архитектора Ирина Алексеева иһитиннэрэр.Саҥа паркаҕа спорт, оҕо, ыччат кииннэрэ, сүрүн уонна коммерческэй эбийиэктэр баар буолуохтара.
Санатабыт, күрэс ааспыт сыл сэтинньи 20 күнүгэр, Москубаҕа буолбут XXVI норуоттар икки ардыларынааҕы “Зодчество-2018” бэстибээл иһинэн саҕаламмыта. Манна Арассыыйаттан уонна тас дойдулартан 87 хампаанньа кытынна. Куоластааһын түмүгүнэн финалга 5 кыттааччы киирдэ: консорциумнар “KUYAAR”, “ATRIUM/ВОСТОК+”, “ICUBE/Smart Heart”, Тимур Башкаев архитектурнай бюрота уонна “Wowhaus”. Дьүүллүүр сүбэ састаабыгар Дьокуускай, Новосибирск, Москуба, Санкт-Петербург куораттар бастыҥ экспертэрэ киирдилэр. Ил Дархан Айсен Николаев баһылыыр.
