Ленскэй оройуонун Орто-Наахара нэһилиэгэр 25 миэстэлээх саҥа хотон үлэҕэ киирдэ. Хаһаайыстыбаны эдэр пиэрмэр, физика учуутала Алексей Гуляев салайар. Бу туһунан “Ленский вестник” оройуоннааҕы хаһыакка суруллар.
“Саҥа хотон улахан түннүктээх, киэҥ-куоҥ олорор дьиэҕэ майгынныыр. Пиэрмэр уокка кыраны төлөөрү улахан түннүктээбит”, – диэн иһитиннэриигэ суруллар. Ааспыт сыллаахха пиэрмэр 400 тыһ солк субсидия ылбыт.
“Билигин 27 төбө сүөһүлээхпит, олортон 14 ыанар ынах. 6 ынах төрөөрү тураллар. Инникитин былааммыт киэҥ. Ол курдук, хаһаайыстыбабытын кэҥэтэн, оҕуруот аһын үүннэриинэн эмиэ дьарыктанар былааннаахпыт. Сэбиэскэй кэм саҕана манна хортуоска олордо сылдьыбыттар эбит. Ол сири чөлүгэр түһэрэн хаппыыста, моркуоп, сүбүөкүлэ үүннэриэхпит. Ону таһынан, үүтү переработкалааһыны күүскэ үлэлэтиэхпит. Ону батарыыга кыһалҕа суох. Барытын манна ылаллар. Ленскэйтэн эмиэ үлэх киирэр. Дьон ордук сүөгэй, суорат, иэдьэгэй атыылаһаллар. Субсидия уонна грант ыларга докумуон оҥоруутугар уонна үбүнэн көмөҕө наадыйабыт. Икки сыл иһигэр бэйэм хармааммыттан 1 мөл солк тутуннум. Биллэн турар, кирэдьиит ылбытым. Ол кырата суох быраһыан ааҕа турар. Бу кыһалҕалар өрөспүүбүлүкэ, оройуон уонна нэһилиэк салалталарын көмөтүнэн быһаарыллыахтара диэммин эрэнэбин. Бэйэм өттүбүттэн салгыы таһаарыылаахтык үлэлиэм-хамныам диэн эрэннэрэбин. Төрөөбүт дойдубар үлэлиир баҕа баар. ”, — диэн Гуляев иһитиннэрэр.
