Уус-Алдан улууһун Суотту нэһилиэгэр оскуола саҥа дьиэтэ 2021 сыл диэки тутуллуо. Бу туһунан Ил Түмэн пресс-сулууспата иһитиннэрэр.
2013 сыллаахха оскуола дьиэтин үрдэ сууллан көтүрүллүбүтэ.
“Оҕолор үөрэнэргэ сатабыла суох, бэйэ-бэйэлэриттэн тэйиччи турар эбийиэктэргэ: начаалынай оскуолаҕа, спорт саалатыгар, мастарыскыайга, интернатка уо.д.а. үөрэммиттэрэ номнуо биэс сыл буолла. 2018-2019 үөрэх сылыгар 196 оҕо үөрэнэр”, — диэн иһитиннэриигэ суруллар.
220 миэстэлээх саҥа оскуола тутулларыгар 453,4 мөл солк көрүллүбүт.
“Бу күннэргэ Уус-Алдан улууһун дьаһалтата бэдэрээтчиги талыыга күрэс биллэриэ. Тутуу үлэтэ болдьоҕор түмүктэниэхтээх. Биһиги бэйэбит өттүбүтүттэн эбээһинэспитин толоруохпут”, — диэн СӨ Бырабыыталыстыбатын бэрэссэдээтэлэ Владимир Солодов иһитиннэрдэ.
Суотту нэһилиэгэ улуус кииниттэн 69 км тэйиччи сытар.
