Уус-Алдан улууһун Суотту нэһилиэгэр үөрэх кыһата тэриллибитэ 60 сылыгар аналлаах, “Сайдар – үүнэр оскуолабыт" диэн Суотту орто оскуолатын үлэһиттэрин акция- кэнсиэрэ буолан ааста.
Кэнсиэргэ оскуола 62 үлэһитэ кыттыыны ылла. Ырыаһыттар, үҥкүүһүттэр, оскуола устуоруйатын көрдөрөр видео-презентациялар дьон биһирэбилин ыллылар. Суотту нэһилиэгин тэрилтэлэрэ, бэтэрээн учууталлар, оскуоланы араас сылларга бүтэрбит уонна үлэлээн ааспыт дьон эҕэрдэ бастыҥын эттилэр, харчынан көмө оҥордулар.
Акция түөрт түһүмэхтээх. Ол курдук, кулун тутар 2 күнүгэр, Суотту орто оскуолатын араас сылларга бүтэрбит дьон ортотугар волейболга күрэхтэһии ыытыллыаҕа. Кулун тутар 7 күнүгэр оскуола үөрэнээччилэрин кэнсиэрэ, оттон 16-с чыыһылаҕа 11-с кылаас үөрэнээччилэрин кэнсиэрэ буолуоҕа. Бу тэрээһиннэргэ оскуолаҕа араас сылларга үөрэммит, үлэлээбит дьон, тэрилтэлэр уонна биирдиилээн дьон бары көхтөөхтүк кыттыахтара диэн эрэнэбит.
Акция-кэнсиэргэ Суотту нэһилиэгин салалтата 100 тыһ солк сэртипикээти туттарда. Нэһилиэк тэрилтэлэрэ: балыыһа, ОДьКХ, техникум, култуура дьиэлэрэ, Суотту орто оскуолатын бүтэрбит билигин оскуолаҕа үлэлии-хамныы сылдьар дьон акцияны саҕалаатылар. Уопсайа, 251 тыһ солк уу харчынан киирдэ.
“Үлэҕэ кынаттаабыт, элбэххэ үөрэппит, такайбыт истиҥник саныыр, махталлаах оскуолабыт 60 сылын бэлиэтиирин астына иһиттибит. Акцияҕа үөрэ-көтө кыттан, сэмэй кылааппытын киллэрдибит. Үлэлиир кэммитигэр кэнсиэргэ кыттыы ураты өйдөбүлү хаалларбытын саныыбыт. Сатыыр-сатаабат бары баҕаран туран кыттара. Аҥаардас репетиция, гостуруоллар туһунан кыра көрдөөх кинигэ суруллуон сөбө буолуо. Оройуоннай бэстибээлгэ ансаамбылынан лауреат буолан оройуон ыһыаҕар таһаҕас тиэйэр массыынаҕа тиэллэн киирэн ыллыы турарбыт бу баар курдук. Дьокуускайга хорунан киирэн радиоҕа уһуллуу эмиэ баара. Суотту оскуолатын кэллэктиибин кэнсиэрэ үрдүк таһымнаахтык, чаҕылхайдык этэҥҥэ ааста. Бииргэ үлэлээбит үлэһиттэрбитигэр, күндү салайааччыларбытыгар, аҕа табаарыстарбытыгар, үөлээннээхтэрбитигэр, үөрэнээччилэрбитигэр, биһигини билэр бар дьоммутугар итии-истиҥ эҕэрдэбитин ыытабыт”, – диэн Суотту орто оскуолатыгар араас сылларга үлэлээн ааспыт учууталлар суруйаллар.
