Киирии

Киирии

Өлүөхүмэ улууһун Даппарай нэһилиэгэр уу оботторор тутуу уонна носуостуур ыстаансыйа үлэҕэ киирдэ. Онон олохтоохтор төгүрүк сыл устата туох да кыһалҕата суох уунан туһанар кыахтаннылар. Хочуолунай дьиэтигэр уу хачайданан 600 кубометр кэриҥнээх иһиккэ харайыллар. Бу туһунан олохтоох хаһыакка суруллар.

Кыыллаах нэһилиэгин баһылыга Раиса Лавернова этэринэн, бу бырайыак ааспыт сыл муус устар ыйыгар СӨ ОДьКХ уонна оройуоннааҕы, олохтоох дьаһалта түһэрсибит үс өрүттээх сөбүлэҥ көмөтүнэн  олоххо киирбит. Бырайыак уопсай сыаната – 6,3 мөл солк тэҥнэспит. Ол иһигэр 1,75 мөл солк оройуоннааҕы, 750 тыһ солк олохтоох дьаһалта бүддьүөтүттэн көрүллүбүт.

Билигин Даппарайга 800-чэ киһи олорор. “Биһиги нэһилиэкпитигэр уунан хааччыйыы кыһалҕата турбута ыраатта. Уматык суох буолааччы, сороҕор тиэхиньикэ алдьанара, тыраанспар үрдүк эниэни кыайан тахсыбакка кыһалҕаны үөскэтэрэ. Онон сотору кэминэн олохтоохтор туох да кыһалҕата суох хочуолунайтан уу ылар буолаллара улахан ситиһии буолар. Бу бырайыак олоххо киирэригэр олохтоохтор эмиэ сүҥкэн көмөлөөхтөр. Ол курдук, Егор Петров биригээдэтэ 530 м уһуннаах уу турбатын   уурбуттара оттон Олег Корнилов биригээдэтэ уот линиятын өйөбүллэрин оҥорбуттара”, – диэн Раиса Лавернова киэн тутта кэпсээтэ.

Нэһилиэк хочуолунайа социальнай эбийиэктэри барытын ититэр. Ону таһынан, 24 кыбартыыралаах түөрт дьиэни уонна 28 чааһынай дьиэлэри сылытар.

ykt.ru хаартыската

Тарҕат:

Комментарии

Защитный код Обновить