Киирии

Киирии

Кулун тутар 11 күнүгэр Айсен Николаев Амма улууһугар сырытта. Манна Саха сирин норуоттарын VII спортивнай оонньууларыгар тутулла турар эбийиэктэри көрдө-иһиттэ. Бу туһунан Ил Дархан уонна Бырабыыталыстыба пресс-сулууспата иһитиннэрэр.

VII спортивнай оонньуулар былырыын ыытыллыахтаахтар этэ. Хомойуох иһин, Амма улууһа халаан уутуттан улаханнык эмсэҕэлээн оонньуулары 2019 сылга көһөрбүттэрэ. Онон от ыйын 3-8 күннэригэр Кыыс Амма Саха сирин бастыҥ спортсменнарын уонна ыалдьыттары түмүө.

Бөтүҥ нэһилиэгэр 220 миэстэлээх оскуола саҥа дьиэтин уонна тутулла турар успуорт саалатын бэрэбиэркэлээтэ. Адаптивнай успуорт көрүҥнэригэр аналлаах, 1300 кв м иэннээх саала былаан быһыытынан оонньуулар арыллыыларыгар үлэҕэ киириэхтээх. Икки этээстээх дьиэҕэ тустуу уонна эрчиллэр саалалар, суунар, сыгынньахтанар уонна мэдэссиинэ хосторо баар буолуохтара. Доруобуйаларыгар хааччахтаах дьон холкутук сылдьалларыгар анаан пандустардаах, көтөҕөр массыыналаах буолуоҕа. Оттон оскуола саҥа дьиэтигэр ис-тас үлэтэ бара турар. Икки этээстээх дьиэ от ыйыгар үлэҕэ киирэрэ былааннанар.  

Чапчылҕан нэһилиэгэр мини-футболга аналлаах манежтаах успуорт саалатын көрдө. Бары эбийиэктэргэ үлэ хаамыыта кыраапык быһыытынан бара турар. Тутуу матырыйааллара бааллар.

Аммаҕа 3000 миэстэлээх, манежтаах стадиону уонна успуорт саалатыгар сырытта.   Икки эбийиэк ааспыт сыл күһүнүгэр үлэҕэ киирбиттэр.

Айсен Николаев эбийиэктэри көрүү түмүгүнэн үлэ хаамыыта хойутааһына суох кыраапыгынан бара турарын бэлиэтээтэ. Уонна суол өрөмүөнүн, тыраанспарынан хааччыйыы уо.д.а. кэккэ боппуруостары быһаарарга эттэ. “Аммаҕа баар саҥа стадион, успуорт саалата номнуо үлэлии тураллар, дьон дьарыктаналлар. Билигин Бөтүҥ уонна Чапчылҕан нэһилиэктэригэр успуорт саалалара тутулла тураллар. Былааннаммыт болдьоххо үлэҕэ киириэхтэрэ. Бөтүҥ оскуолатын тутуута саарбахтардаах. Үбүлээһин былырыын күһүн көрүллүбүтэ. Түтүү үлэтэ тэтимнээхтик барар турар. Сайыҥҥа диэри сүрүн үлэтэ түмүктэнэригэр эрэл баар”, – диэн Айсен Николаев эттэ. Ону таһынан, Амма, Бөтүҥ, Чапчылҕан нэһилиэктэрин суоллара оҥоһуллуохтара.  Уонна Амматтан Бөтүҥҥэ диэри айанныыр суол учаастага өрөмүөннэниэ.

Ил Дархан этэринэн куттала суох буолууну хааччыйыы, аһылык уонна тарҕатыы боппуруостара болдьоҕор быһаарыллыахтара. Айсен Сергеевич олохтоохтор бэлэмнэниигэ көхтөөхтүк кытталларын бэлиэтээтэ. Ол курдук, ыраастааһыҥҥа, көҕөрдүү үлэтигэр, култуурнай бырагырааммаҕа көхтөөхтүк кытталлар, урбаанньыттар спонсор буоларга бэлэмнэр. “Аммаҕа хаһан да буолбатах оонньуулар ыытыллыахтара диэммин эрэнэбин”, – диэн Айсен Николаев эттэ.

Тарҕат:

Комментарии

Защитный код Обновить