Урбаанньыт, меценат Афанасий Алексеев “Якутянин года-2018” бириэмийэ Гран-при хаһаайынынан буолла.
Тэрийэр хамыыһыйаҕа уопсайа 82 сайаапка киирбит. Олортон 23 киһи талыллыбыт.
“Бу күн ким кыайыылаах буоларыттан тутулуга суох, бары 82 сорунааччыларга ытыспыт тыаһын бэлэхтиэх тустаахпыт. Номинаннар – дьоһун дьон. Кинилэр хас биирдиилэрэ хос санаата суох, дууһаларын, тус олохторун ууран уонна кэккэ ороскуоттары уйунан үтүө дьыалалары оҥороллор”, — диэн Ил Дархан эттэ.
Норуот уонна тэрийэр кэмитиэт чилиэннэрэ куоластааһыннарын түмүгүнэн алта лауреат талылынна: Сардана Такырова — “Инстаграм” социальнай ситимҥэ @sosdetiyakutii бырайыагы тэрйээччи. Кини бырайыагын көмөтүнэн оҕолор эмтэниилэригэр 20 тахса мөл солк хомуйуллубут. Баҕа өттүнэн үлэлиир Антон Васильев. “Социальная столовая” бырайыак салайааччыта Ирина Бузова. ХИФУ устудьуона Александр Неустроев, кини ааспыт сыллаахха бииргэ үөрэнэр оҕолорун тыатааҕыттан быыһаабыта. “Движение без границ” бырайыагы тэрийээччи Нюргуяна Попова. Чөл олоҕу туруулаһар Матвей Лыткин.
“Синет” хампаанньа 100 тыһ солк анал бирииһин Ирина Бузоваҕа туттардылар. Бириэмийэ Гран-при хаһаайынынан меценат, уопсастыбаннай үлэһит, урбаанньыт Афанасий Алексеев буолла.
“Мин улахан махталбын күн сирин көрдөрбүт күн күбэй ийэбэр этиэхпин баҕарабын. Ийээ, бу эн кыайыыҥ!”, — диэн Афанасий Алексеев сыанаттан ийэтигэр истиҥ махтал тылларын эттэ.
Лауреаттарга 925 боруобалаах үрүҥ көмүс мэтээллэри туттардылар. Оттон кыайыылаах мэтээлэ сэттэ бриллианынан киэргэтиллибит.
