Сэттис төгүлүн ыытыллар “Байдам” атыы-эргиэн дьаарбаҥката биһиэхэ, Мииринэй куорат олохтоохторугар олус кэтэһиилээх тэрээһин буолар. Куруук буоларын курдук элбэх дьон мустан бэрт сэргэхтик ааста. Бу тэрээһини Саха сирин тыатын хаhаайыстыбатын министиэристибэтэ, “Ситим” медиа-бөлөх, “Алроса”, “Профалмаас” профсойуус, Мииринэй оройуонун дьаhалтата, мээрийэ ыыталлар.
Мииринэйдэр сибиэһэй, хаачыстыбалаах аһы дөрүн-дөрүн эрэ амсайар дьон, олохтоох бородууксуйа атыытын-тутуутун сүрдээҕин туоххаһыйа күүтэбит. Онон, бу күннэргэ “Байдам-2019” дьаарбаҥка ыытыллан, дьон сүрдээҕин диэн сэргэхсийдэ, санаата дьайҕарда. Эргиэн да олус көхтөөхтүк, харгыһа суох ыытылынна.
Быйылгы “Байдамҥа” кыттыыны ыллылар: Дьокуускайтан “Мясной двор”, “Сахаагропродукт” тэрилтэлэр. Бүлүүттэн “Сыа Бyлyy” тыа хаһаайыстыбатын кэпэрэтиибэ, Сунтаартан “Хочо” фирма, “Уйгу” ТХКП (Күүкэй), Кириэстээхтэн “Табаҕа” ТХПК. Өлүөхүмэттэн “Кладовые Олекмы” ас-үөл тэрилтэтэ.
Бу сырыыга “Мясной двор” уонна “Сахаагропродукт” тэрилтэлэр адьаһын күннээтилэр. Астарын арааһа, элбэҕэ, минньигэһэ... Дьоҥҥо ыстыылыктаах ыыһаммыт сылгы этин, сип-сибиэһэй халбаһыыны, чыыр, барыҥаатта, муксуун өрөҕөтүн амсатаары атыылааччы кыргыттар ыҥыра турдулар. Ас арааһа дэлэй: бөдүргэй, түөс көмүрүөтэ, нөмөй, күөн, симии харта, тиэптэл, кэтилиэт, бэлимиэн, фарш, куурусса филетэ, ыдьырыччы буспут сибиинньэ этэ, сылгы сыалаах ойоҕоһо, халбаһыы эгэлгэтэ, пастрома, ветчина, ыыһаммыт уонна тууһаммыт балыктар, сиикэй арыы, иҥиир иэдьэгэй, быырпах. Барыта сип-сибиэһэй уонна хаачыстыбалаах. Этэргэ дылы, Омоллоон олоҕо, Дьэргэстэй ыһыаҕа буолла.
Оттон Сунтаар улууһуттан кэлбит хаһаайыстыбалар чөчөгөйгөн сүөгэйгэ, быластаах арыыга, суоракка, отоҥҥо, барыанньаҕа, сироптарга, суоктарга тиийэ араас аһы атыылаатылар. Барыта хамаҕатык батарылынна.
Таһырдьа да атыы-эргиэн эрчимнээхтик ыытылынна. Дьокуускайтан “Р.Шестаков” тэрилтэтэ, Усуйаана эп-эмис бөкүнүк чыырын, тылбыытыгар тиийэ аҕалбыт. Сыаналара да удамыр. Быйыл уопсайынан чэпчэки сыаналаах дьаарбаҥка буолла.
“Сыа Бүлүү” ТХПК 400 солк арыытыгар “ойоҕос тостор” уочарата этэ. Мииринэйдэр чэпчэки арыыны ылаары туох да сүрдээҕин тулуурдаахтык уочаракка турдулар. Манна ааспыт кыһын арыы сыаната 1 кг - 900-1000 солк этэ, билигин 700 солк. Арыы бу диэки олус күндү.
Оттон Сунтаар улууһун Күүкэйин “Уйгу” ТХПК үүттэрин уонна чөчөгөйдөрүн сыаната биһиэнинээҕэр букатын чэпчэки эбит.
Өлүөхүмэ “Кладовые Олекмы” тэрилтэтин маҥан, сымнаҕас сыырын, баара-суоҕа чаастан эрэ ордук кэм устата атыылаатылар. Сыаната да удамыр – 650 солк. Мииринэйдэр маннык чэпчэки сыыры көрүөх бэтэрээ өттүгэр атыылаһа оҕустулар. “Туох ааттаах аҕыйах сыырын аҕаллыгыт? Аны хаһан кэлэҕит?” – диэн атыылаһааччылартан ыйыталаһыы-токкоолоһуу бөҕөтө буоллулар. Дьэ ити курдук Дьокуускайтан уонна улуустартан кэлэн талыы-талба аһы-үөлү тилэри тартылар. Киһини астыннарар атыы-тутуу дьаарбаҥката буолан ааста. Ааттыын да байдам !
Мииринэйдэр мантан инньэ, айанныыр суол сиэкэнийэн, ас-үөл кэлиитэ буомурарын учуоттаан, бородуукта талбатын хаһааннылар, санаалара да олуһун көтөҕүлүннэ. Дьон куулунан иҥэмтиэлээх, сибиэһэй аһылыгы дьиэлэригэр ким массыынанан, ким салаасканан тиэннилэр.
Махтал эйиэхэ балысхан астаах “Байдам-2019” дьаарбаҥка!
Станислав Алексеев, Мииринэй к., ааптар хаартыскалара.
