Киирии

Киирии

Мин Мииринэй куоратын Дьарыктаах буолуу киин “буруолуу сылдьар” бакаансыйаларын сотору-сотору тиһэбин. Сахалар ньиэп-гаас хостуур Орто Ботуобуйа сиригэр, “ТаасҮрэхнефтегаздобыча” (“Роснефть”) тэрилтэҕэ үлэлии барар буолан эрэллэр.

Онно 60-ча саха баар. Аны ньиэп-гаас үлэтин сирэллэр. “АЛРОСА-Гааска” инженертэн саҕалаан аптамаат ситимин маастара үлэлэр бааллар. Ону ким да болҕомтотугар ылбатах этэ. “Тыалга-кууска, тымныыга тимири кытта үлэлээбэппин” диэбит буолуохтаахтар. Тыала-кууһа суох сир наада диир буоллаххытына, “АЛРОСА-Охрана” диэн тэрилтэҕэ, сылаас дьиэҕэ олорон үлэлиэххитин сөп. Хамнаһа да үчүгэй. Ааспыт кыһын 1-4 эрэсэрээттээх харабыллары ыҥыра сылдьыбыттара. Манна баахта быһыытынан үлэлииллэр.  Бу тэрилтэ сотору-сотору харабыл үлэ миэстэтин таhаарар. Уопуттаах, эрэсэрээттээх буоларыҥ ирдэнэр.

Мииринэйтэн Накыыҥҥа бөртөлүөтүнэн тиийэн уопсайга олорон үлэлиир ыарахан дуо? Харабылга эрэ буолбакка уот-күүс, сибээс таҥааччыларга эмиэ наадыйаллар. Маннык үлэлэри төрүт олохтоох ыччат сэргээбэт буолан, хаарыан бакаансыйалар уччуйан тураллар. Үөһээ-Мууна урууда хостуур тиһигэр (“Верхне-Мунское месторождение”) идэтийбит харабыл ирдэнэр диэн хаста да суруйбутум. Биһиги дьоммут хаһан уһуктуохтарыгар, хомунуохтарыгар диэри, соҕуруу дойду эрэттэрэ “хап” гынан киирбиттэрэ ыраатта. Ньиэп-гаас хостуур “Восточная Сибирь” диэн хампаанньаҕа эколог ирдэнэрин, хамнаһа үрдүгүн суруйан турабын. Манна ким да сэҥээрбэтэҕэ. Сотору кэминэн үлэһит көстүбүтэ.

Сахалар олорор сэлиэнньэлэригэр Арыылаахха, 58 тыһ хамнастаах төрөтөр биэлсэр ирдэнэр этэ. Ону эмиэ ким да сэҥээрбэтэҕэ. Мииринэй оройуонугар учуутал букатын тиийбэт. Саха оҕолоро бу диэки үлэлии кэлбэттэр. Холобур, Сүлдьүкээргэ учууталга үчүгэй хамнас төлүө этилэр. Үөрэнээччи да аҕыйах. Баара-суоҕа 40-ча оҕолоох оскуола. Тоҕо эрэ ол диэки бара сатаабаттар. Мииринэй оройуонун учууталлара саамай үрдүк хамнаһы аахсаллар. Уопуттаах учууталлар хамнастара дьоһун.

“Якутскэнерго” тэрилтэ үрдүк хамнаһы, социальнай бакыаты эрэннэрэр. Электриктэргэ аналлаах бакаансыйалары хас эмэ сыл суруйдум. Сэҥээрбэттэр. Оччоҕо үлэбитин онтон-мантан дьон кэлэн былдьаатаҕына соһуйаайаххыт.

 Станислав Алексеев, Мииринэй к.

Тарҕат:

Комментарии

Защитный код Обновить