Бу кэмҥэ Арассыыйа 25 регионугар 2019 сыл ыам ыйын 20-24 күннэригэр Казань куоракка ыытыллар VII-c «Эдэр профессоналлар» (WorldSkills Russia) Национальнай финалга кыттар иһин сүүмэрдиир күрэхтэһиилэр (отборочные соревнования) буола тураллар.
Ол курдук, сүүмэрдиир күрэхтэһиилэр муус устар 1-5 күннэригэр Москуба куоракка сатабыл (компетенция) 17 көрүҥэр буолан аастылар. «Москва» Технополис былаһааккатыгар Арассыыйа 40 регионун, ол иһигэр биһиги өрөспүүбүлүкэбит, эдэр профессоналлара уонна юниордара күрэхтэстилэр.
Муус устар 6 күнүгэр WorldSkills Russia хамсааһыны Саха сиригэр сүрүннүүр киин үлэһиттэрэ ХИФУ Инфраструктурнай технология колледжын 2 кууруһун устудьуона Тимур Тайшин «Компьютер оонньууларын уонна мультимедийнай сыһыарыылары толкуйдаан оҥоруу» сатабылга бочуоттаах 3-с миэстэни ылбытын туһунан бастакы үөрүүлээх сонуну туттулар.
Биһиги кыттааччыны арыаллаан илдьибит компатриот-эспиэри уонна бириис хаһаайынын кытта кэпсэттибит.
ХИФУ Информационнай систиэмэлэри туһаныы уонна хааччыйыы кафедратын преподавателэ, Москуба сүүмэрдиир күрэхтэһиилэрин компатриот-эспиэрэ Мария Грязнухина:
—Кыттааччылар бары олус бэлэмнээх уонна күүстээх этилэр. Кинилэри улахан уопуттаах эспиэрдэр дьүүллээбиттэрэ. Биһиги эмиэ олус бэркэ кытынныбыт. Атын кыттааччылартан баалбыт улахан итэҕэһэ суох этэ. Тыҥааһыннаах күрэхтэһии буолан ааста. Тимур бу сатабылга уонна сүүмэрдиир күрэхтэһиилэргэ бастакытын кыттыбытын бэлиэтиир тоҕоостоох. Онон туруорбут сорукпутун ситистибит дии саныыбыт. Кырдьыгынан эттэххэ, арыый атын түмүгү кэтэспиппит, 2-с миэстэ буолар инибит диэн эрэммиппит. Онуоха 11 баал тиийбэтэ.
ХИФУ Инфраструктурнай технология колледжын 2 кууруһун устудьуона, Москуба сүүмэрдиир күрэхтэһиилэрин «боруонсатын» хаһаайына Тимур Тайшин:
Мин
—Орто Халыма улуустааҕы гимназиятын бүтэрбитим. Компьютерынан оҕо сааспыттан үлүһүйэбин, бу эйгэни үксүгэр бэйэм, интэриниэт нөҥүө баһылаабытым. Оттон «Компьютер оонньууларын уонна мультимедийнай сыһыарыылары толкуйдаан оҥоруу» сатабылынынан адьас соторутааҕыта дьарыктанан саҕалаабытым. Колледжпар регионнааҕы күрэхтэһиигэ кытын диэн көрдөспүттэригэр сөбүлэспитим. Онуоха ылсыбыт саҥа сатабылбар тугу да билбэт этим, ол да буоллар күннэтэ күүскэ бэлэмнэнэммин, Москубаҕа сүүмэрдиир күрэхтэһиигэ кыттар кыаҕы ылбытым.Күрэхтэһии былааһааккатыгар биһиги үс күнү быһа компьютер оонньуутун толкуйдаан оҥорбуппут. Онуоха оонньооччу таларыгар 8 түһүмэҕи оҥорорго сорудах биэрбиттэрэ. Хас биирдии түһүмэх 10-нуу ыйытыылаах буолуохтаах. Мобильнай платформаҕа оҥоһуллубут аныгы оонньуулар бары кэриэтэ хоруйдуур кэм, оонньуур күүс (энергия), очуокуо, муҥутуур ситиһии (рекорд), доҕоттору кытта күрэстэһии диэн салаалаах буолаллар. Тус бэйэм иккис модульга (оонньууну салайыы механиката, анимация), оччо баһылыы илик буоламмын, ыарахаттары көрсүбүтүм.Москубатааҕы сүүмэрдиир күрэхтэһиилэргэ кыттаммын олус улахан уопуту ыллым, салгыы өссө күүскэ сайдар ирдэнэрин өйдөөтүм. Ситиһиим туһунан бастатан туран ийэбэр эппитим. Кини Орто Халымаҕа олорор, мин туспар олус долгуйар, онон үөрүүтэ улахан.
Тимур бастакы сырыыттан Москуба уонна Самаара уобалаһын кыттыылаахтарын кэннигэр хаалларан, олус үчүгэй түмүгү көрдөрдө диэн этиэх кэриҥнээхпит. Ыйыллыбыт сатабылга «Кыһыл көмүһү» Москуба куорат, оттон «Үрүҥ көмүһү» Новосибирскай уобалас кыттааччылара ылбыттар.
Саха сиригэр сүүмэрдиир күрэхтэһиилэр муус устар 15-30 күннэригэр Дьокуускай куоракка Т.Г. Десяткин аатынан Промышленнай техникумҥа уонна Мииринэй куоракка Регионнааҕы технологическай колледжка ыытыллыахтара. Сүүмэрдиир күрэхтэһиилэри үөрүүлээхтик арыйыы муус устар 18 күнүгэр «Россия – моя история» түмэл дьиэтигэр буолуоҕа. Тэрийээччилэр Арассыыйа 60-тан тахса регионуттан 600 кэриҥэ кыттааччыны көрсөөрү бэлэмнэнэллэр.
WorldSkills Russia хамсааһыны
Саха сиригэр сүрүннүүр киинтэн
Мария Дегтярева бэлэмнээтэ
