Арассыыйа Генеральнай борокуратууратын бэрэбиэркэтин кэннэ дойду хас да эрэгийиэннэригэр бөҕү тиэйии-таһыы тарыыбын ортотунан 14,5% диэри чэпчэтиэхтэрэ. Бу тарыыбы бэрэбиэркэлииргэ дьокутааттар борокуратуураҕа модьуйбуттара. Чэпчэтии Саха сирин эмиэ хаарыйыаҕа.
“Судаарыстыбаннай Дума боротокуолламмыт сорудаҕын толоруу чэрчитинэн биһиги генеральнай борокуратуураҕа тахсыбыппыт. Кинилэр олус хаачыстыбалаахтык үлэлээтилэр уона хас да эрэгийиэҥҥэ тарыыбы сиэри таһынан, сөбө суохтук үрдэппиттэрэ ырылхайдык көстөн кэллэ. Инньэ гынан, үрдэтиллибит тарыыбы ортотунан 14,5% аччатарга быһаарынныбыт”, - диэтэ Госдума экологияҕа уонна тулалыыр эйгэни харыстыыр кэмитиэтин бэрэссэдээтэлэ Владимир Бурматов.
Кини этэринэн, сыананы быһыы кэмигэр Саха сиригэр, Мордовия, Татарстан, Чувашия өрөспүүбүлүкэлэригэр, Алтаай, Пермь, Приморье кыраайдарыгар, Иркутскай, Пенза уонна Саратов уобаластарыгар сөбө суохтук үрдэппиттэрэ биллибит.
