Киирии

Киирии

Кулун тутар 1 күнүттэн ыла дойду олохтоохторун сокуоҥҥа саҥа уларыйыылар күүтэллэр.

Кулун тутар 1 күнүттэн 2019 сыл олунньу 1 күнүгэр диэри хапытаал амнистиятын “иккис долгуна” ыытыллыаҕа. Бу кэм иһигэр кыраныысса таһыгар дьиэлээх-уоттаах, харчы харайа сытар киһи, онтун Арассыыйаҕа официальнайдык декларациялыыр кыахтанар. Маныаха кинилэр бу баайдарын кистии-саба сыппытарын иһин ханнык да административнай, нолуок миэрэтэ (сорох түгэҥҥэ холуобунай) туһаныллыа суоҕа. Бу амнистия физическэй сирэйдэргэ эрэ сыһыаннаах (ол иһигэр амнистия “бастакы долгунугар” кыттыбыт дьоҥҥо эмиэ). Декларацияны сарсыҥҥыттан саҕалаан биэриэххэ сөп. Саамай сүрүнэ – тас дойдуга баар счет уонна хамсаабат баай-дуол бу сыл кулун тутар 1 күнүн инниттэн бэлиэтэммит буолуохтаах.

Аан бастаан Арассыыйаҕа хапытаалы амнистиялааһын 2015-2016 сс. ыытыллыбыта. Оччолорго 7 тыһ. киһи амнистиянан туһаммыт. Ааспыт сыл бүтүүтэ иккис амнистияны ыытар туһунан Владимир Путин этии киллэрбитэ. Бэрэсидьиэн этиитин олунньу 19 күнүгэр ылыммыттара. Бу амнистиянан боростуой дьон туһанан да барбатарбыт, сэмээр дойдуга харчы киирэриттэн “үөрүөхпүт”.

“Даача амнистията” уонна Росреестрга сүбэлэтии уһуур

Кулун тутар 1 күнүттэн “даача амнистията” түмүктэниэхтээх этэ. “Даача амнистиятын” көмөтүнэн, дойду олохтоохторо куорат таһынааҕы сир учаастактарыгар туттубут дьиэлэрин уонна учаастактарын судургутук бэлиэтэтэр (ИЖС) кыахтаах этилэр. Бу амнистия уларытыы тутуу кэмигэр ылыллыбыт учаастактары сокуон ирдэбилигэр сөп түбэһиннэрэн бэлиэтэттэрэргэ анаан толкуйдаммыта. Ол курдук, кадаастыр пааспара, булгуччулаах тутууну киллэрии көҥүлэ суох судаарыстыба бэлиэтэниитин оҥорторуохха сөп. Маннык судургутуллубут бэрээдэк өссө 2006 сылтан 2010 сылга диэри туһаныллыбыта. Салгыы бу сыл кулун тутарыгар диэри уһаппыттара. Ол эрээри, олунньуга Госдума дьокутааттара амнистияны салгыы 2020 сыл кулун тутарыгар диэри уһатарга куоластаабыттара.

Маны сэргэ, хамсаабат баайы-дуолу атыылаһыыга ыйытыылар үөскээбит буоллахтарына, сөптөөх хоруйу Росреестр үлэһиттэриттэн ылар кыахтанаҕыт. Кулун тутар 1 күнүттэн ыла, Росреестр Федеральнай кадастр палаататын кытары кыттыһан “Биир кэлим консультация күнэ” диэни ыытар буолуохтара.

Уокка сырдыыр сэлиэттэр

Кулун тутар 18 күнүттэн ыла суол быраабылатыгар саҥа уларыйыы киирэр. Түүҥҥү өттүгэр суол быһылааныгар түбэспит итиэннэ нэһилиэнньэлээх пуун таһыгар тохтообут суоппардар хайаан даҕаны анал уокка сырдыыр сэлиэти эбэтэр санныга кэтиллэр сиэҕэ суох уокка сырдыыр таҥаһы кэтиэхтээхтэр (ол барыта ГОСТ ыстандаартыгар эппиэттиир буолуохтаах). Бу быраабыла күнүскү бороҥуйга эмиэ туттуллуоҕа. Саҥа быраабыланы кэспит суоппардар административнай сэрэтиини ылыахтара эбэтэр 500 солк. ысытрааптаныахтара.

Тарҕат:

Ырытыыгын суруй

Защитный код
Обновить

Бүтэһик сонуннар