Киирии

Киирии

Муус устар 24 күнүттэн ыам ыйын 1 күнүгэр диэри алмаастаах кыраай киинигэр Мииринэй эйэни туойар” диэн бэстибээл 19-с төгүлүн ыытыллар.

Урукку тэрээһини ахтан аһарар буоллахха, саамай элбэх кыттааччылаах бэстибээл 1987 сыллаахха буолан ааспыта. Оччолорго бэстибээлгэ кыттыыны ыла Саха АССР 17 оройуонуттан, Дьокуускайтан, ССРС 12 куоратыттан, Сирияттан ырыаhыттар кэлэ сылдьыбыттара. Ыалдьыт ахсаана 1,5 тыһ лаппа куоһарбыта.

1987 сыллаахха олунньу ый бүтэһигэр “Эдэр коммунист” хаhыат аналлаах кэрэспэндьиэнин быhыытынан, Мииринэйгэ бу тэрээhини сырдата кэлэ сылдьыбытым. “Вилюй” көстүүнэйгэ түөрт буолан хоммуппут. Аналлаах толуонунан 2 №-дээх остолобуойга аһаабыппыт. Ол кэмтэн ыла номнуо 32 сыл ааһа охсубут. Оччотооҕу бэстибээлгэ Израиль талабырдьыттарын кытары охсуһар, көҥүл иһин туруулаһар палестинецтар “Садака” бөлөхтөрө баара. Кинилэр ансаамбылларын кытары Алмазнай, Арыылаах, Заря бөһүөлэктэринэн “уот” кыһыл “Вилюйгэсстрой” оптуобуһунан бииргэ айаннаабытым. Палестина уолаттарын ааттарын билигин да умнубаппын: Махмуд Бадриддин, Юсеф Талаль, Мустафа Лаки. Араб уолаттара айан тухары “Фалестын, Ана мин Фалестын”(Мин палестиммын), Фреедом фор Фалестын (Палестинаҕа көҥүлү!) дии-дии барабааны лигийэ-лигийэ, сарыы-оруу былаастаах ыллаан былааhы ылбыттара. “Бэриммэт” палестинецтары кытары адьас далбарга сылдьыбытым диэххэ сөп. Ханна сылдьыбыт сирбитигэр нууччалыы үгэһинэн туустаах килиэбинэн көрсүбүттэрэ.

2019 сыл сааскы кэмэ үүнэ оҕуста. Быйыл “Мииринэй эйэни туойар” бэстибээлинэн Мииринэй аатын Арассыыйа устун киэҥник биллэриэххэ диэн сыал-сорук турар. Мииринэй куорат түөрт оскуолатыттан, МРТКтан, МПТИтэн, волонтердар хайыы-үйэ үлэлии-хамсыы сылдьаллар. Аатырбыт ырыа бэстибээлигэр кыттыан баҕалаах, бэйэтин талаанын көрдөрөргө дьулуһар да ыччат баһаам. Манна аҥаардас ырыанан, үҥкүүнэн-битиинэн эрэ муҥурданыахтара суоҕа. Ол курдук, хоһоон суруйарга холонооччулар, тыйаатыр эдэр талааннарын, ураннар, фотографтар, суруналыыстар, бэл асчыттар куорумнара ыытыллар. “Мииринэй эйэни туойар” ырыа-тойук биhирэмигэр Саха сирин улуустарыттан, Арассыыйа куораттарыттан бэрт ахсааннаах ыалдьыт кэлэригэр соһуйбаккын.  Ол биричиинэтэ биллэр. Айан суола олус ыарахан.      Бүлүү улуустарыттан Мииринэйгэ сиринэн сырыы уурайда. Дьокуускай да диэкиттэн кэлээччи аҕыйах буолсу. Онон, сүрүн кыттааччыларынан олохтоох ыччат, Удачнай, Ленскэй, Айхал, Чернышевскай, Светлэй, Арыылаах талааннара буолуохтара. Бэстибээл пресс-киинэ биллэрэринэн, барыта 700 киһи кыттыыны ылара күүтүллэр.

2017 сыллаахха 18-с бэстибээл 500 кыттааччылаах этэ. Быйыл “Алмаас” култуура дыбарыаhыгар сэттэ кэнсиэрт буолуоҕа. Манна Арассыыйа таһымыгар араадьыйа-эфиргэ бэйэтин сөҥ куолаһын биллэрбит ди-джей Groove, “ТНТ” көрүдьүөстээх шоуларын “сулуһа” В.Орлов кэлэр. Мииринэй ыччата муҥура суох үөрүүнэн көрсүө. Испанияттан электроннай муусуканы баһылаабыт Гомес уонна фотограф-худуоһунньук Фальгазо кэлиэхтээхтэр. Сэбиэскэй кэмтэн хаалбыт үгэс сиэринэн ырыа-тойук биhирэмин кыттыылаахтара Чернышевскай, Светлэй, Алмазнай, Арыылаах бөһүөлэктэригэр кэнсиэртиэхтэрэ. Бэстибээл устатын тухары араас хабааннаах тэрээһин ыытыллара күүтүллэр. Онно киирэллэр: “Фест-хаамыылар”, араас хабааннаах маастар-кылаастар, хоһоон түһүлгэтэ, брэйкердэр күрэхтэрэ, джем-сейшннэр, КВНнар уо.д.а. Урукку курдук “Алмаас” култуура дыбарыаһыгар түүҥҥү кэнсиэртэр буолаллара күүтүллэр.

Ыам ыйын 1 күнүгэр бэстибээл кыттыылаахтара Ленин болуоссатын үктэлиттэн кэнсиэртиэхтэрэ. Дьэ онон, бу күннэргэ Мииринэй олохтоохторугар ырыа-тойук бырааһынньыгар, ыччат айымньытыттан дуоһуйа сынньанар түгэн тосхойуоҕа.  

1987 eder kommynict

1987 сыллаах бэстибээл туһунан “Эдэр коммунист” хаһыакка суруйуум.

almaac ancaambl

“Алмаас” бэтэрээннэр ансаамбыла.

almaactaax kyraai yxxat

Көрү-нары көҕүлүттэн тутар алмаастаах кыраай ыччата.

xbk talaannara

Мииринэй ХБК талааннара.

myndr nalaan

Мииринэй ыччата мындырын уонна талаанын көрдөрөр.

yccat cergiir

Ыччат уус-уран айымньыны сэргиир.

kadettar

Чернышевскай кадеттара – бастыҥ кыттааччылар.

ieyii

ynkyy

Станислав Алексеев, Мииринэй к., ааптар архыыбыттан хаартыскалар.    

Тарҕат:

Комментарии

Защитный код Обновить