Таба маассабай төрүөҕэ саҕаланна. Билиҥҥитэ Аллараа Халыма ыстаадаларыгар 122 тугут, Усуйаанаҕа 130 төрөөтө.
Тыа хаһаайыстыбатын улуустарга управлениета иһитиннэрбитинэн, быйыл муус устар 19 күнүнээҕи туругунан, бас билии көрүҥүттэн тутулуга суох өрөспүүбүлүкэ бары хаһаайыстыбаларыгар 135 тыһ. 374 таба, ол иһигэр кэпэрэтииптэргэ, аҕа ууһун общиналарыгар, бааһынай хаһаайыстыбаларга 131 тыһ. 85 таба баар. Тыа хаһаайыстыбатын министиэристибэтигэр отчуоттуур 106 хаһаайыстыбаҕа барыта 1 тыһ. 364 киһи, ол иһигэр 1 тыһ. 81 табаһыт, 283 чуум үлэһитэ үлэлиир.
Билигин хаһаайыстыбалар ыстаадаларга аһы-үөлү, туттар тэрили, табаары тиэрдэ, ыстаадалары кытары сибээстэһэр араадьыйа диспиэччэр сулууспатын үлэтин бөҕөргөтө сылдьаллар. Оттон табаһыттар кыстаабыт сирдэриттэн көһөр сайыҥҥы мэччирэҥ хайысхаларын чопчулууллар, табаны чөл тутар, төрүөҕү энчирэппэккэ ылар туһугар сыралаһаллар.
