“Тыа сиригэр үлэлииргэ бырамыысыланнаска үлэлиирдээҕэр быдан табыгастаах буолуо”, - диэн Ленскэй улууһун дьаһалтатын пресс-сулууспата иһитиннэрэр. Улууска тыа хаһаайыстыбатын бородууксуйатын оҥорооччулар субсидияларын 2 төгүл үрдэттилэр. 1 киилэ үүккэ 35 солкуобайы буолбакка, 70 солкуобайы төлүүр буолуохтара.
Оройуон дьаһалтатын туһааннаах дьаһала тыа сиригэр олоруон баҕалаахтары түмэр, өйүүр сыаллаах.
«Олохтоохтор биир ынахтан 2212 киилэ үүтү туттарыахтара. 1 киилэ үүт 70 солкуобайга тэҥ. Холобур, тыа сирин олохтооҕо биир ынахтан 155 тыһыынча солкуобайы ылар буолуо. Биир ынах сылга 197 солкуобай тыһыынча дохуоту киллэрдэҕинэ, ыйга 16,5 тыһыынча солкуобайга тэҥ. Үс ынахтаах дьон ыйдааҕы дохуоттара 50 тыһыынчаҕа тэҥнэһиэн сөп» – диэн Ленскэй улууһун баһылыгын солбуйааччыта Артем Артемьев бэлиэтиир.
2018 сыллаахха «Батамай» ХЭУо 531 тонна үүтү ыан туттарбыт. 2019 сылга үүт туттарааччылар ахсааннара үрдүүр туруктаах. Инникитин муниципальнай бырагыраамаҕа Бэчинчэ, Чамча, Орто Наахара тыа хаһаайыстыбатынан дьарыктанааччылара холбоһуохтара.
