Бүгүн, муус устар 23 күнүгэр, СӨ Үрдүкү Суута Сиэйэ Уола болдьоҕун иннинэ тахсар дьыалатын хос көрдө.
Санатар буоллахха, Дьокуускай куораттааҕы суукка Сиэйэ Уола болдьоҕун иннинэ тахсар (УДО) дьыалатын бу дьыл олунньу 14 күнүгэр көрбүттэрэ. Сиэйэ Уола албакааттара Аркадий Анисимов уонна Нина Протопопова көмүскээччилэрин туруорсуутунан больоҕун иннинэ таһаарарга этиммиттэрэ. Онно Сиэйэ Уола хаайыыга олорорун тухары 7 төгүл биһирэбили ылбыта, 4 араас оробуочай идэлэри баһылаабыта итиэннэ уопсастыбаннас, биирдиилээн дьон үчүгэйдик характеристикалыыллара этиллибитэ. Ол Сиэйэ Уола буруйун билинэн кэмсинэрин, көнөр суолга турбутун туоһулуурун эппиттэрэ. Итиэннэ эмсэҕэлээччигэ материальай уонна моральнай хоромньуну төлүүрүгэр күлүүс хаайыытыгар сытан хайдах даҕаны кыайан толуйар кыаҕа суоҕун, 4 сокуоннай сааһын туола илик иитимньилээҕэ ахтыллыбыта. Маны таһынан, Сиэйэ Уолун кэргэнэ бииргэ төрөөбүтэ уонна кини кэргэнэ өлөн, кырачаан оҕо төгүрүк тулаайах хаалбытын эпиэкэҕэ ылбыттарынан, аҥардас кэргэнэ биэс оҕону атаҕар туруорарын учуоттуулларыгар көрдөспүттэрэ. Дьокуускай куораттааҕы суут Сиэйэ Уола хаайыыга олорон 6 төгүл ол-бу кыра бэрээдэги кэһиилэрдээҕинэн болдьоҕун иннинэ тахсар кыаҕа суох диэн матыыптаабыттара, итиэннэ эмсэҕэлээччигэ хоромньутун толору толуйбатаҕын быһыытынан, болдьоҕун иннинэ тахсара сөбө суох диэбиттэрэ. Билиҥҥи туругунан, Сиэйэ Уола эмсэҕэлээччигэ 800 тыһ. тахса биэрэрдээх.
Саха сирин Үрдүкү Суута дьыаланы хаттаан көрөн баран, Сиэйэ Уолун болдьоҕун инниттэн тахсарын аккаастаата, куорат суутун оннунан хаалларда.
