Киирии

Киирии

Ырыаһыт Виктор Иванов-Сиэйэ Уола дьыалатын туһунан истибэтэх саха, арааһа, суоҕа буолуо. Бу соторутааҕыта, муус устар 23 күнүгэр, Саха сирин Үрдүкү Суута дьыаланы хаттаан көрөн баран, Сиэйэ Уола болдьоҕун иннинэ тахсарын аккаастаабыта, куорат суутун уурааҕын оннунан хаалларбыта.

Хомойуох иһин, социальнай ситим нөҥүө Сиэйэ Уола албакаата Нина Протопопованы холуннарар араас сымыйа сурах тарҕаммыт. Ол курдук,“албакаат наһаа улахан сууманы көрдүүр. Бүтүн өрөспүүбүлүкэ олохтоохторуттан хомуллубут харчы барыта албакаакка барар”диэбит курдук ис хоһоонноох иһитиннэриилэр тарҕаммыттар. Бу сурах ис дьиҥин билээри албакаат Нина Николаевна Протопопованы кытта кэпсэттим. Кини маннык кэпсиир: “Мин Сиэйэ Уола хаайыыга киириэҕиттэн буор босхо үлэлэһэ сылдьабын. Ол аата, түөрт сылтан ордон эрэр. Норуот хомуйбут харчыта эмсэҕэлээбит киһи ирдэбилин (иск)төлүүргэ барар. Биир да кэппиэйкэ албакааттарга хаалбат. Онон ити олох сымыйа сурахтар. Билиҥҥи туругунан, 278 тыһ. солк. хомулунна. Александра Алексеевна Яковлева счетугар ыыталлар. Ону Дьокуускайдааҕы Сунтаар улууһун түмсүүтүн бэрэстэбиитэлэ Владимир Иннокентьевич Лазарев холуонньа буҕалтыарыйатыгар илдьэн туттарар. Харчы Виктор счетугар киирэр. Виктор киирбит харчыны бу счекка ыытыҥ диэн сайабылыанньа суруйар. Ити курдук, киирбит харчы эмсэҕэлээччигэ барар”.

Сунтаар улууһун түмсүүтүн толорооччу дириэктэрэ Владимир Иннокентьевич Лазарев:Хомуллубут 278 тыһ. солк. Виктор сайабылыанньа суруйан, эмсэҕэлээбит киһиэхэ ыыппыта. Манна эбии түөрт сыл үлэлээбит хамнаһын сорҕото эбиллэн, быһа холоон, 300 тыһ. тахса солк. барбыта. Билигин эмиэ кыралаан киирбит буолуохтаах. Ол харчыны хайдах гынарбытын Виктор бэйэтэ быһаарыа. Дьон ыытар харчыта Александра Алексеевна Яковлева счетугар киирэр. Ону Александра Алексеевна миэхэ ыытан иһэр. Мин ону холуонньа буҕалтыарыйатыгар илдьэн туттарабын. Суут иннинэ барытын оннук туттарар этибит. Салгыы ону хайдах гынарын Виктор бэйэтэ быһаарыа. Тоҕо диэтэххэ, ол Викторга көмө быһыытынан хомуллубут харчы буоллаҕа. Баҕар, дьонугар бэрдэриэ, баҕар, “сыттын” диэ, эбэтэр депозикка уктарыа. Албакаат Нина Николаевна бэйэтин баҕа санаатынан босхо үлэлии сылдьар. Онон итинник баһааҕырдаллара олох куһаҕан. Араас сымыйа сураҕы тарҕатымаҥ, албакааттар ис дууһаларыттан үлэлии сылдьаллар”.

Сунтаар улууһун Тойбохой нэһилиэгин олохтооҕо Александра Алексеевна Яковлева:Дьон ыыппыт харчыта мин счеппар түһэр. Ону мин Владимир Иннокентьевичка ыытабын. Виктор миэхэ ыыттарар туһунан көрдөспүтүн иһин сөбүлэспитим. Мин кини аймаҕа эҥин буолбатахпын. Виктор Тойбохойго кэнсиэртии кэллэҕинэ куруук миэхэ түһэр этэ. Инньы гынан, билэр оҕом. Мин70 саастаах биэнсийэлээх киһибин. 47 сыл оҕо дьиэтигэр, кэлин аҕыс сыл –кулуупка үлэлээбитим. Мээнэ ону-маны тарҕаталларын олох сөбүлээбэппин. Дьон онон эрэ олорор курдуктар. Ол иһин бассаабы отой сөбүлээбэппин. Киирбит харчыны Владимир Иннокентьевичка ыытан иһэбин. Ону кини холуонньаҕа илдьэн туттарар. Бачча сууманы туттарда диэн кумааҕытын миэхэ ыытан иһэр. Харчыны албакаакка биэрэллэр диэн отой сымыйа. Нина Николаевна буор босхо үлэлии сылдьар киһи”.

Суруналыыс, уопсастыбанньык, УФСИН уопсастыбаннай сэбиэтин сэкирэтээрэ Владислав Петрович Коротов бу дьыалаҕа сүрэҕин баҕатынан күүс-көмө буолар: “Мин албакаат Нина Николаевнаны кытта үлэлээбитим ыраатта. Кини буор босхо үлэлии сылдьар. Инньэ гынан, тарҕаммыт сурахтар оруна суохтар. Биһиги, Сиэйэ Уолун кытта үлэлэһэр кини аҕа табаарыстара, Бииктэр көрдөһүүтүнэн, Сунтаар улууһун Тойбохойугар олорор Александра Алексеевна Яковлева аатыгар харчы хомуйбуппут. 278 тыһ. солк. хомуллубута. Хаайыылары кытта үлэлээбитим уонча сыл буолла. Араас дьылҕалаах дьон бааллар. Олорго көмөлөһө сатыыбын. Бииктэри уруккуттан билэр буоламмын сүрэҕим баҕатынан көмөлөһөбүн”.

Ити курдук, киирбит харчы норуот кытаанах хонтуруолугар сылдьар. Кэппиэйкэ да туора барбат. Онон сымыйа сураҕы итэҕэйимэҥ. Ис сүрэхтэриттэн үлэлии сылдьар дьону баһааҕырдар мөкү кэпсээни тарҕатымаҥ. Эдэр, кэскиллээх ырыаһыппытын, Сиэйэ Уолун, өйүөҕүҥ!

Тарҕат:

Комментарии

Защитный код Обновить