Киирии

Киирии

Мииринэй курдук ураты укулааттаах оройуоҥҥа, бастатан туран, тэхиньиичэскэй хабааннах идэ ирдэнэрэ чуолкай. Матымаатык, химик, физик, черчение идэлээхтэр “1С” бырагыраамманы, көмпүүтэри, автоматиканы, электрическэй тэриэбэлэри билээччилэр манна табыллаллар.

Манна сорох дьон  үчүгэй үлэ туhугар саастарын аахсыбакка аналлаах куурустарга үөрэнэр буоллулар. Ол курдук, “Атыыhыт”, “Бухаалтыр”, “Баттах кырыйааччы”, “Асчыт”, “Кондитер”, “Суоппар” идэлэргэ үөрэнэллэр. Төлөбүрэ улахана суох. Олоххо ирдэнэр идэлэри биэрэр кыһанан Мииринэйдээҕи эрэгэйиэн тэхиньиичэскэй колледжа (МРТК) буолар. Колледж кэтэхтэн үөрэтэр төлөбүрдээх куурустардаах. Барыта 85 идэҕэ уһуйаллар. Бу кэрискэттэн ордук тыыппалаахтарын чуолаан ыйабын.

Суоппардар ханна баҕар наадалар. Колледж “В”, “С” категорияҕа дьону үөрэппитэ быданнаата. Аны билигин “ТС” категориянан “Д”-ны (оптуобустар) ылыахха сөп. Үөрэх сыаната да ботуччу (56.200 солк). Болдьоҕо – алта ый. Уматык тиэйэр массыыналар суоппардарыгар “ТС” категориянан түөрт ый үөрэтэллэр. Төлөбүрэ – 40 тыһ солк. “С” категорияҕа үөрэнии – 53.000 солк. “В” категорияҕа үөрэнии – 32.000 солк.

Монтажник (“Монтажник технологического оборудования”) идэтигэр түөрт ый үөрэнэллэр. Төлөбүрэ – 24 тыһ солк.

Ньиэп-гаас промышленноһыгар технологическай тэриэбэ оператора идэтигэр (2-3 эрэсэрээт) түөрт ый уһуйаллар. Төлөбүрэ – 27.900 солк.

Алмаас, ньиэп-гаас промышленноһыгар, уот-күөс салаатыгар 2,3,4,5 эрэсэрээттээх КИПиА наладчигын идэтигэр үөрэтии 18000-28.100 солк диэри халбаҥныыр. Үөрэх болдьоҕо – 3-5 ый.

Оттон КИПиА силиэсэрин иккис эрэсэрээтигэр үөрэтии – 28.200 солк. Түөрт ый уһуйаллар. Бу саамай ыарахан сыаналаах куурустар.

Светлэй техникумугар эмиэ кэтэхтэн куурустарга үөрэниэххэ сөп. Светлэйгэ силиэсэртэн “ДОПОГ” суоппарыгар тиийэ идэ ылыахха сөп.

Маны саха ыччата, саастаах да дьон болҕомтолоругар ылыахтара диэммин эрэнэбин.   Холобур, Дьокуускайга оптуобус суоппарын идэтин ыларга булгуччу категория ирдэнэр. Ону  улуустар орто профессиональнай үөрэхтэрин кыһалара кыайан хааччыйбаттар. Мантан сылтаан оптуобуска саха суоппардар аҕыйахтар. Мииринэй куоратыгар оробуочай идэни кылгас болдьоххо ыларга соруначчы баһаам. Ол иһигэр атын омук дьоно эмиэ бааллар. Мин санаабар орто тэхиньиичэскэй үөрэх уонна оробуочай идэлэр дьону ордук тардар буоллулар.

mexanik

Массыына мэхээньигин идэтэ ордук сыаналанар.

cybaarka

Газ сыбаарсыктара.

yctydyonnar

Колледж устудьуоннара.

orobyochai tabugactaax

Оробуочай миэстэтэ табыгастаах буолуохтаах.

yccat kiliebin bylynar

Тиэхиньикэни билэр ыччат килиэбин булунар.

elektromontajnik

Электромонтажник идэтэ хамнастаах.

 

Станислав Алексеев, Мииринэй куората.

Тарҕат:

Комментарии

Защитный код Обновить