Таатта бэтэрээннэригэр “Сэрии оҕото” дастабырыанньаны туттардылар

Таатта улууһугар уһуйааннарга, оскуолаларга, араас тэрилтэлэргэ бэтэрээннэри чиэстээтилэр. “Айхаллан, Улуу Кыайыы” тэрээһиҥҥэ Ытык Күөл 87 олохтооҕор “Сэрии оҕото” дастабырыанньаны туттардылар.

Быйыл Тааттаҕа “Сэрии оҕото” статуһу 479 киһи ылла. Кыайыы пуондатын аһар кэнсиэр-тэрээһиҥҥэ улуус баһылыга М.М.Соров Ытык Күөл 87 бэтэрээнигэр дастабырыанньалары туттарда. Михаил Соров улуус дьаһалтатын, дьокутааттарын ааттарыттан бэтэрээннэргэ эҕэрдэтин тиэртэ. Таатта улууһуттан уоттаах сэрии толоонугар 1758 эдэр чэгиэн дьон барбытыттан, мантан аҥара кыргыс толоонугар үйэ саас охтубута. Атыттара кыайыы-хотуу көтөллөнөн төрөөбүт алаһа дьиэлэригэр төннөн кэлэр дьолу билбиттэрэ. Сэрииттэн төннүбүт дьон эйэлээх олоҕу чөлүгэр түһэриигэ харыларын ньыппарынан туран үлэлээбиттэрин, сэриигэ барбыт 600 киһи сураҕа суох сүппүтүн, кини хараастан бэлиэтээтэ.

Улуус баһылыга: “Эдэр ыччат, бу эһиги иннигитигэр олорор эбээлэргит, эһээлэргит сэрии кэмигэр оҕолор этилэр, улахан дьону кытта тэҥҥэ тыылга хаалан Улуу Кыайыыны уһансан сарсыарда эрдэттэн түүҥҥэ диэри үлэлээбиттэрэ. Ойор күннээх оҕо саастара сэрии ыар, аччык туор кэмигэр ааспыта. Биһиги улууспутугар билигин биир Аҕа дойду Улуу сэриитин кыттыылааҕа Иван Иосифович Винокуров Уус Тааттаҕа олорор. Кинини эҕэрдэлии делегациянан бара сылдьыахпыт. Ил Дархан А.С.Николаев бу сыл ыам ыйын 9 күнүттэн кэлэр сыл баччатыгар диэри Кыайыы сылынан биллэрдэ. Нэһилиэнньэ күүһүнэн Улуу Кыайыы 75 сылынан улууспутугар пуонда тэрийэбит. Манна киирбит үбүнэн Кыайыы болуоссатын, улууспутугар баар 20-чэ пааматынньыктары, кыргыһыы толоонугар охтон сураҕа суох сүппүттэр стелаларын саҥардыы, Герой Д.А.Петров туһунан уус-уран киинэни устуу уонна да атын үйэтитии үлэтин ыытыахпыт».

Кыайыы пуондатын дьааһыгар бастакы көмө харчыны улуус баһылыга М.М.Соров, салгыы тэрилтэлэр салайааччылара уктулар. Улуус бары оскуолаларын бастыҥ нүөмэрдэрэ Кыайыы кэнсиэрин сырдык сарыалын бэлэхтээтилэр.

 С. Халгаева, ulusmedia