Киһиэхэ кыра наада. Ордук дьонтон-сэргэттэн, төрүт буортан тэлэһийэ сырыттахха, онуоха эбии олох очуругар оҕустардахха.
Ол курдук, Мохсоҕоллоох бөһүөлэгэр 6 №-дээх Исправительнай холуонньаҕа буруйданан олорор саха дьоно төрүт итэҕэлтэн, төрүт сиэртэн-майгыттан тирэх ылар, куттарын-сүрдэрин көннөрүнэр, отуордарын оҥостор санаанан салайтаран Айыы Дьиэтэ туттар-оҥостор сырдык ыраламмыттар, ону олоххо киллэрэргэ быһаарыы ылыммыттар.
Бэрт буоллаҕа. Холуонньа салалтата ону утарбат эбит эрээри, биллэн турар, тэрилтэ бүддьүөтүгэр оннук хайысхаҕа үп көрүллүбэт. Онон уолаттар бэйэлэрэ кыаннахтарына тутталлар, суох да суох.
Дьэ, ол иһин Мохсоҕоллоох холуонньатыгар буруйданан олорор саха дьоно көмө көрдөөн улуустар баһылыктарыгар сурук ыыппыттар. Баһылыктар нөҥүө биир дойдулаахтарыттан — уопсастыбаннай түмсүүлэр, тэрилтэлээх да, биирдиилээн да урбаанньыттар көмөлөһүөхтэрэ диэн. Хайаан да үбүнэн-харчынан буолбатар, тутуу матырыйаалынан, бэл, сүбэнэн-аманан.
Улуустар баһылыктара, дьаһалталар ыччаты кытта үлэлиир салаалара, уопсастыбаннай тэрилтэлэр олох очуругар оҕустарбыт биир дойдулаахтарын ыра санааларын болҕомтоҕо ылыахтара диэн эрэнэ саныыбыт. “Ол дойдуга” олорооччулар баһыйар үгүстэрэ саха омук инникигэ эрэлэ буолуохтаах ыччат дьон буоларын умнар сатаммат.
