Өрөспүүбүлүкэҕэ ойуур баһаарын үөрэтиигэ инновационнай технологиялар туттуллаллар. Бу туһунан СӨ бырабыыталыстыбатын пресс-сулууспата иһитиннэрэр.
“Бүлүү, Мэҥэ Хаҥалас, Нам, Ньурба, Сангаар, Таатта, Уус Алдан, Чурапчы улуустарыгар уонна Дьокуускай куоракка ойуур баһаарын 22 камера көмөтүнэн кэтээн көрөн үөрэтии былааннанар. Биир камера 20 км диэри, ол эбэтэр 60 тыһ гектар иэннээх сири хабар кыахтаах. Устар камералар баһаар иэнин уонна координататын быһаарар, операторга иһитиннэрии ыытар бырагырааммалаахтар”, – диэн иһитиннэриигэ суруллар.
Арассыыйа ыксаллаах быһыыга-майгыга министиэристибэтин Саха сиринээҕи салаатын сүрүн управлениета, ойуур баһаарыгар хабыллар кутталлаах 273 нэһилиэнньэлээх пууҥҥа бэлэм буолууну бэрэбиэркэлээтэ. Ойуур баһаарын умуорууга 517 киһилээх уонна 197 тиэхиньикэлээх РСЧС бөлөҕө тэриллибит. Улахан баһаар куттала суоһаатаҕына 4143 киһилээх, 243 тиэхиньикэлээх баһаарынай уонна быыһыыр чаастар күүс-көмө буолуохтара.
