Үөһээ Бүлүүтээҕи М.А.Алексеев аатынан өрөспүүбүлүкэтээҕи лиссиэй-интэринээтэ федеральнай таһымнаах грант куонкурсугар кытынна. Үөрэх тэрилтэлэригэр кыайыылаах тахсан, 5 мөл. 880 тыһ. солк. ылар буолла.
Үөһээ Бүлүүтээҕи лиссиэй-интэринээттэн Олег Иванов салайааччылаах «АйМИТ» учууталлар хамаандалара “Создай свою математику. Создай свою информатику. Создай свою технологию. Создай свое будущее” диэн бырайыактара кыайыылаахтар истэригэр ааттанна. Бу бырайыак математика, информатика, технология предметтэрин холбоон, аныгы технологиялары туһанан оҕону эбии дьарыктыыр сыаллаах оҥоһуллубута. Бырайыагы ыам ыйын саҕаланыыта ирдэбил быһыытынан Москваҕа грант хамыыһыйатыгар тиэрдибиттэр.
Лиссиэй-интэринээт дириэктэрэ Нина Федотова:
– Бу кыайыы бастакы хардыы буолар. Билигин бырайыак былаанын быһыытынан үлэтэ хас да этабынан барыахтаах. Лиссиэйбит оҕо эргиччи сайдыылаах буоларын туһугар үлэлиир-айар.
Уопсай түмүккэ 3 хайысхаҕа 74 үөрэх тэрилтэлэрэ грант ыллылар, ол иһигэр Саха Сириттэн 6 грант кыайыылаахтара бааллар. Лиссиэй-интэринээт кэлэктиибин бу сүдү кыайыыгытынан эҕэрдэлиибит!
Валентина ДОГОЮСОВА, ulus.media
