Киирии

Киирии

Биһиэхэ Мииринэй оройуонугар, “НВК Саха” биэриилэрин быспыттара ыраатта. Бу маннык дьайыы дьону улаханнык хомотон турар.

Ол оннугар “Якутия 24” ханаалы көрдөрбүттэрэ ыраатта. Онно төрөөбүт тылбытынан биэриилэр суохтар. Оттон арбаммыт спутник тэриэлкэтэ “НВК Саха” биэриилэрин сүгүн-саҕын хаппат эбит. Мииринэйгэ атын куораттан эмискэччи “күөрэс гыммыт” пиирмэ бэрэстэбиитэллэрэ, куорат кыбартыыраларын кэрийэ сылдьан хаабыл тэлэбиидэнньэтин босхо холбуубут дииллэр. Биир ыйга абонентскай төлөбүрэ 1000 солк. диэн “үөртүлэр”. “Он-лайн” оонньуу, киинэ эгэлгэтэ баар диэн ымсыырдаллар. Ону мин Интэриниэттэн да булбаппын дуо?!

Арай сахалыы биэрии мэлигир эбит. Солуута суох хатылаһар биэриини сэргээбэппит. Дьон, норуот төрөөбүт тылынан биэриилэри, сонуннары, сахалыы кэнсиэртэри, киинэлэри, атын улуустар хайдах олороллорун туһунан босхо көрүөн баҕарар. Муҥ сатаатар Дьокуускайтан сахалыы ханаал, сүүрбэ босхо сыыппара (“Цифровой канал”) ханаалыгар киирбэтэҕэ хомотто. “Яндекс-эфиргэ” сахалыы биэриилэри хаптарыахха сөп дииллэр да, маны ис дьиҥин ким да билбэт. Оттон Саха сирэ технологическэй-информационнай өттүнэн инники күөҥҥэ сылдьарын туһунан дакылаат бөҕөтө оҥоһуллар. Дьэ ити курдук, Сахабыт сиригэр бэйэлээх бэйэбит сахалыы ханаалбытын, босхо көрөртөн матан хааллыбыт. Мииринэйгэ “Телеком” сүүс ханаалы холбуубун диэн биллэрэр уонна сыыппараҕа аналлаах приставка атыылыыр эбэтэр уларсар. “НВК Саха” бу ханаал иһигэр баар дииллэр. Аны бу сүүс ханаалга ыйга абонент быһыытынан суумманы төлүөххэ наада. Туруортарыыта эмиэ босхо буолбатаҕа биллэр. Ити курдук Мииринэйгэ Саха сириттэн төрүт ойдом, кырыыба олорон бүтэйдэр бүтэйэн иһэбит.

Станислав Алексеев, Мииринэй куората.

Тарҕат:

Комментарии

Защитный код Обновить