Киирии

Киирии

Бүгүн дойду үрдүнэн Ыччат күнэ бэлиэтэнэр. Олохпут биир саамай долгутуулаах, кэскиллээх кэрдииһэ – оҕолорбут, ыччаттарбыт оскуола, үөрэх кыһатын бүтэрэн, олох киэҥ аартыгар үктэниилэрэ буолар. Онон сибээстээн абитуриеннарбыт, выпускниктарбыт бүгүҥҥү күҥҥэ туох сонуннаахтарын билсиэҕиҥ.

 

Ефрем Аманатов, Саха политехническэй лицей:

Amanat

Экономист идэтигэр туттарсаары сылдьабын, ол эрээри докумуоммун чопчу ханнык үөрэх кыһатыгар биэрэрбин өссө да быһаарына иликпин.

Айхан Михайлов Сунтаар, Өрөспүүбүлүкэ лицейэ:

 Айхан

 

– Докумуоннарбын ХИФУ ФТИ-га биэриэм. “Электроэнергия уонна электротехника” диэҥҥэ. Долгуйбаппын. Үөрэхпин бүтэрэ охсон үлэлии барыахпын баҕарабын. Үчүгэй исписэлиис буолаары үчүгэйдик үөрэниэм!

Елена Баишева , 30-с №-дээх оскуола:

 Елена

— Оскуолабын былырыын бүтэрбитим, билигин ХИФУ психология институтугар туттарсаарсы сылдьабын. Ол гынан баран чопчу ханнык туһаайыыны таларбын быһаарына иликпин: эбэтэр психолог, эбэтэр социальнай үлэһит.

Юля Санникова, Мэҥэ-Хаҥалас, Табаҕа орто оскуолата:

 Санникова

 

Биһиги кылаас баҕа санаабытын суруйан баран, бытыылка иһигэр укпуппут уонна биэс сылынан ааҕаары чөҥөчөк иһигэр кистээбиппит. Онно мин “М.С.Щепкин аатынан театральнай училищаҕа үөрэнэн, артыыс идэтин баһылаабыт киһи” диэн суруйбут этим. Онон оҕо эрдэҕинээҕи ыра санаабын олоххо киллэрэр баҕалаахпын.

 Василий Старостин, ЯФЭК выпускнига:

 Василий

Дьокуускайдааҕы үп-экэниэмикэ колледжын бүтэрдим. Салгыы үөрэхпин үрдэтээри ХИФУ үп-экэниэмикэ институгар туттарсар баҕа санаалаахпын. Ылар инилэр... Долгуйабын...


Оҕолорбут олохторун быһаарар, долгутуулаах кэмҥэ сылдьар буоллахтарына, итини барытын ааспыт, идэлэрин баһылаабыт ыччаппыт салгыы туох былааннаахтарый? Идэлэринэн үлэ булбуттар дуу, суох дуу?

Анна Аманатова , ХИФУ, Арассыыйа хотугулуу-илиҥҥи норуоттар тылларын уонна култуураларын институтун выпускнига:

 Анна

Литературнай үлэһит салаатын туйгуннук, кыһыл дипломнаах бүтэрдим. Түөрт сыл тухары үгүс элбэххэ үөрэнэн, идэбитин толору баһылаатыбыт исписэлиис буоларга уһаарыллан таҕыстым. Биһиги институппутугар төрөөбүт тылларын, литератураларын, култуураларын таптыыр, ону дириҥник үөрэтиэн, чинчийиэн баҕарар, суруйар, айар дьоҕурдаах оҕолорго киирэн үөрэнэллэригэр сүбэлиибин. Быраактыкабытын өрөспүүбүлүкэ араас редакцияларыгар, телевиденияҕа, түмэллэргэ, оскуолаларга ааһабыт. Салгыы үөрэммит институппар магистратураҕа туттарсар былааннаахпын. Түгэнинэн туһанан уһуйааччыларбар, институппар махталбын тиэрдиэм этэ.

Азамат Егасов , ХИФУ,физико-техническай институтун выпускнига:

 Егасов

–“Технология художественной обработки материалов” диэн салааны бүтэрдим. Ювелир оҥоһуктарын оҥорого үөрэтэллэр. Киһи айар дьоҕурун олус сайыннарар, тугу баҕарбыккын оҥорон таһаарыаххын сөп. Өйгүттэн сатаан уруһуйдуур буоллаххына – бу үөрэх эйиэхэ барсар. Бэйэм оҕо эрдэхпиттэн видеоҕа устарбын, хаартыскаҕа түһэрэрбин сөбүлүүр буолан, Дьокуускай ТВ-гар операторынан үлэлии киирдим. Ол эрээри ювелир үөрэҕин баһылаабыппыттан олох кэмсиммэппин.

Михаил Гоголев, тыа хаһаайыстыбатын техникумун выпускнига:

 Михаил

Мин тыа сирэ сайдарыгар олус наадалаах идэни баһылаан таҕыстым. Салгыы билиим таһымын үрдэтээри ССТХАҕа эбэтэр ХИФУга туттарсар былааннаахпын. Идэни толору баһылыырга кыраттан саҕалыыр ордук, үрдүк үөрэххэ таһымнаах билиилээх, бэлэмнээх киирэҕин. Түгэнинэн туһанан дипломнай үлэм салайааччытыгар Мария Николаевна Аммосова махталбын биллэрэбин. Маны таһынан, бииргэ үөрэммит оҕолорбор олоххутугар ситиһиини, кытаанах доруобуйаны баҕарабын!

Екатерина Никитина , ХИФУ, Инженернай-тэхэньиичэскэй институт:

 Екатерина

Дипломмун туйгунук көмүскээн үөрүү бөҕө! Үөрэхпин кытаанах санаалаах эрэ оҕолорго сүбэлиэм этэ. Билигин төрөөбүт улууспар, Мэҥэ-Хаҥалас Майа сэлиэнньэтин дьаһалтатыгар идэбинэн үлэлээн эрэбин. Салгыы көстөн иһэр ини...

Катя, Оля Малардыровалар, ЯФЭК, ЯТЭК выпускниктара:

 Оля Малардыровалар

Биһиги экэнэмиис-буҕаалтыр идэтин 4-кэ, 5-кэ үөрэнэн бүтэрдибит. Бу үөрэххэ киириэн баҕалаах оҕолор СКЭ түмүгүн биэрэр наадата суох. Аттестаатын орто баалын көрөллөр. Киһи быһыытынан пунктуальнай, дьону кытта уопсай тылы булар, онно-манна аралдьыйбакка биир сиргэ өр олорор буолуоххун наада. Алҕаска биир эмэ соппутуойу сыыһа туруор эрэ... Онон олус эппиэтинстээх эрэ буоллаххына табылан үлэлиигин. Салгыы үөрэхпитин үрдэтэн, кэтэхтэн үөрэнэ-үөрэнэ, идэбитинэн үлэ булан үлэлиир былааннаахпыт.

Абитуриеннарбытыгар, выпускниктарбытыгар олоххо бэйэҕит миэстэҕитин судургутук буларыгытыгар баҕарабын, ханнык да ыарахаттартан чаҕыйбакка, иннгит хоту эрэллэээхтик хардыылааҥ! Санааҕыт саппаҕырбатын, күҥҥүт олоххутун күлүмүрдүү сырдата, сылыта турдун!

Вероника Бурнашева, ХИФУ ОЖ 1 кууруһун устудьуона.

Тарҕат:

Комментарии

Защитный код Обновить