Хаайыыга уонна силиэстийэлиир изоляторга орто оскуола бырагыраамматынан үөрэх дьыла түмүктэннэ. Бу туһунан УФСИН Саха сиринээҕи салаатын пресс-сулууспата иһитиннэрэр.
57 хаайыылаах, ол иһигэр сокуоннай саастарын ситэ илик ыччат нуучча тылыгар уонна ахсааҥҥа экзэмэннэри ситиһиилээхтик туттардылар. Хаайыыга уонна силиэстийэлиир изолятор иһинэн үөрэх алта пууна уонна биир киэһээҥҥи оскуола баар. Манна үрдүк үөрэхтээх 58 учуутал үлэлииллэр. 30-гар диэри саастаах дьон оскуоланы бүтэрэр эбээһинэстээхтэр.
“Инникитин выпускниктарга орто оскуоланы бүтэрбиттэрин туоһулуур аттестаттар туттарыллыахтара. Бу орто оскуолаларга бэриллэр аттестаттан туох да уратыта суох. Докумуоҥҥа хаайыыга туттарыллыбытын туһунан суруллубат. Ол эрэн, хаайыылаах тахсыар диэри аттестат бэйэтин докумуоннарын кытта хараллар”, – диэн пресс-сулууспа бэлиэтиир.
