Дьокуускайга Сомоҕолоһуу сылыгар аналлаах “Гражданский форум-2019” сугулаан саҕаланна.
Икки күн устата уопсастыбанньыктар, толорор былаас бэрэстэбиитэллэрэ, муниципалитеттар уонна биисинэс дьоно гражданскай уопсастыбаны сайыннарыы, уопсастыбанньыктар көҕүлээһиннэрин өйөөһүн уонна салайыы үлэтин тупсарыы тула кэпсэтиэхтэрэ.
Тэрийээччилэр этэллэринэн, сугулааҥҥа кураанах кэпсэтии эрэ буолбакка, баар кыһалҕаны быһаарар чопчу этиилэр ылыныллыахтара. Ол курдук, “Социальная активность” бырайыак чэрчитинэн баҕа өттүнэн тэриллэр дьаһаллары өйүүр сыаллаах икки ресурснай киин тэриллиэҕэ.
Сугулаан кэпсэтэр былаһааккалара Сомоҕолоһуу сылын хайысхаларын кытары дьүөрэлии. Холобур, “Саха сирэ – биһиги уопсай дьиэбит” хайысха араас социальнай кыһалҕалары быһаарарга туһуламмыт, “Төрөөбүт куоратым уонна нэһилиэгим” – өрөспүүбүлүкэ нэһилиэнньэлээх пууннарын сайдыытыгар, оттон “Аһаҕас былаас” – гражданнар былааһы кытары харгыһа суох, аһаҕастык алтыһалларыгар аналлаах үлэлиир.
Сугулаан чэрчитинэн Бэрэсидьиэн граннарыгар кирсэргэ сайаапканы хайдах оҥорорго сэминээрдэр ыытыллыахтара.
Хаартыска: ЯСИА
