Киирии

Киирии

Бу күннэргэ сардаана сибэккинэн симэммит кыыс Аммаҕа өрөспүүбүлүкэ араас муннугуттан ыалдьыттар тоҕуорустулар. Кинилэр Амма кэрэ айылҕатын, дьонун-сэргэтин уонна спортивнай оонньуулар туһунан санааларын кэпсииллэр.

Василий Пахомов, көҥүл тустуу бэтэрээнэ:

paxomov

 Горнай Бэрдьигэстээҕиттэн кэллим. Николай Захаров –Сахааччалыын биир көбүргэ тустан турардаахпын. Чурапчыга элбэхтик бииргэ сылдьыбыппыт. Илии тутуһан дорооболоһор, билсэр киһим этэ. Аммаҕа аан бастакыбын сылдьабын, кэрэ айылҕалаах сайынын дьэ көрдүм, үчүгэй бөҕө эбит, сөтүөлээн дуоһуйдум. Оонньуу аһыллыытыгар сырыттым, төһө да халлаан тымныы буолбутун иһин олус сөбүлээтим. Тустуук буоларым быһыытынан, тустууну кэтиибин. Бу дуобаты көрө бараары сылдьабын, бэйэм эмиэ дуобаттааччыбын.

Федор Белолюбскай “Чэбдик” лааҕыр салайааччыта:

IMG 20190705 WA0002

– Биһиги Мэҥэ Хаҥалас улууһун Лоомтукатыттан үс массыынанан “Чэбдик” лааҕыр оҕолорун илдьэ мэҥэлэрбитигэр ыалдьа кэллибит. Манна дьиэ булан үчүгэйдик олорорбут. Речевкабыт, атрубутикабыт бэлэм. Бу буолаары турар футболу көрө кэллибит. Намнары кытта быһаарыылаах оонньуу буолаары турар. Кыайар инибит диэн эрэллээхпит.

Дмитрий Мартынов, Илиҥ Эҥэртэн сылдьар ыалдьыта:

martynov2

– Мин аһыллыытыгар хомойуох иһин сылдьыбакка хааллым. Кимнээххэ да ыалдьыбаппын. Бары эчэйбэккэ дуоһуйа оонньоотуннар эрэ. Бэйэм урут волейболлуур, ханьыһардыыр этим. Бу пляжнай волейболу, уһун уҥуохтаах омуктар оонньууларын тоҕо киллэрбиттэрин өйдөөбөтүм. Тустууну көрбөппүн, ити курдук.

Туйаара Борисова Дьокуускайтан:

tyiaara2

– Бэҕэһээ киэһэ саҥа кэлбиппит, оонньуу аһыллыытыттан маттыбыт. Ол иһин, оонньуу сабыллыытын долгуйа күүтэбит. Кыра кыыһым волейболунан дьарыктанар буолан, анаан-минээн волейболу көрөбүт. Билигин стадиоҥҥа баран чэпкэки атлетиканы көрүө этибит. Онтон Лээги ат сүүрдүүтүн көрүөхпүт. Бырагымаамма киэҥ! Барыгытыгар ситиһиини баҕарабыт.

Ыалдьыттары кытта кэпсэттэ Вероника Бурнашева

Тарҕат:

Комментарии

Защитный код Обновить

Бүтэһик сонуннар