От ыйын 8 күнүгэр Оччугуй Ботуобуйа үрэх күргэтин тутуу миэстэтигэр кэлэн турабын. Дьокуускайга олорон эрэбилэ суох иһитиннэриилэринэн сирдэтинэр суруналыыстар, тутуу номнуо саҕаламмытын туһунан омун-төлөн тумалыктаах суруйбуттара ыраатта.
Тоҕо дьону буккуйан суруйалларыттан дьиксинэбин. Балаһыанньаны билбэт буолан баран “кураанаҕы эрдимэҥ” эрэ. Эбэтэр манна Мииринэйгэ кэлэн дьыаланы-куолуну илэ хараххытынан көрүҥ.
Оттон Оччугуй Ботуобуй күргэтин тутуу үлэтэ бытаан, дьэ саҥа хамсанан эрэллэр диэн бэлиэтиибин. От ыйын 8 күнүнээҕи хаартыскаларынан туоһуларбын көрдөрөбүн. Оччугуй Ботуобуйа күргэтин билиҥҥи МУАД понтуонуттан арҕаа, Майскай диэн сөтүөлүүр сир диэки тутуохтаахтар. “РНГ-Снабжение” хампаанньа бэдэрээччитэ “ВостоСибспецмонтаж” диэн Москуба тэрилтэтэ тутууга ылсыбыт.
Тохсунньу 22 күнүгэр Оччугуй Ботуобуйа үрэҕин туоруур күргэ 2020 сыл 4-с кыбаарталыгар тутуллан бүтүөхтээх диэн, “Якутия24” интэриниэт порталга бэдэрээччит бэрэстэбиитэлэ биллэрбитэ.
Күргэ уһуна – 190 миэтэрэ, түөрт систээх буолуохтаах диэн, “Бүлүү” федеральнай суол салалтатыттан миэхэ хоруйдаабыттара. Маннык бөдөҥ күргэ тутуутугар аата-ахса суох буор-таас, кырата – мөлүйүөн чиэппэрэ кууп бетон булкадаһыга, сүүһүнэн туонна тимир, ыстаал ирдэнэр.
Оттон дьиҥ дьыалатыгар көрдөххө, миэстэтигэр тутууну ыытар тэрилтэ ыскалаата, күрүө, харабыл буудката, матырыйаал эгэлгэтэ, аата-ахса суох тиэхиньикэ, тэриэбэ, богуончуктар, мастырыскыай көстүбэттэр. Бэдэрээччит күн бүгүн күргэ “атахтарын” да туруора илик. Үрэх аттыгар бүгүн сай ортото – уу-чуумпу. Биир-икки тиэхиньикэ эрэ көстөр. Муостаны тутар-таҥар буһуруктаах үлэ модун далааһынын дьөрү харахтаабатым.
Оччугуй Ботуобуйаны туоруур күргэ субу тутуллуохтааҕын туhунан, “кумахтан өтүүнү хатар” тыллаах-өстөөх дьон эппиттэрин-тыыммыттарын итэҕэйбэппин. Саха сирин сайына олус кылгас. Күһүммүт да чугаһаата. Үрэхпитигэр дьэ саҥа уҥа кытыл сэндэҥэ ойуурун кэрдэн, Сунтаар диэки өттүн дэхсилии сылдьаллар.
Өссө төгүл хатылаан этэбин, күргэ тутуутун тэтимэ бытаан. Ити хаартыскаҕа баар фронтоҥҥа суруллубутун курдук, 2020 сыл алтынньы 31 күнүгэр күргэ дьэндэс гыныа дуо?
Станислав Алексеев, Мииринэй куората, ааптар хаартыскалара.
