Дьокуускай куоракка фермердэр, бааһынай хаһаайыстыбалар уонна тыа сирин кооперацияларын сайдыыларыгар туһуламмыт өрөспүүбүлүкэтээҕи форум саҕаланна. Бу туһунан Ил Дархан уонна бырабыыталыстыба пресс-сулууспата иһитиннэрэр.
Форумҥа фермердэр, тыа хаһаайыстыбатын тэрилтэлэрин салайааччылара үлэлэрин-хамнастарын, үөрүйэхтэрин, субсидия, грант ылыыга өрөспүүбүлүкэтээҕи, федеральнай бырагырааммаларга, куоҥкурустарга кыттыы туһунан кэпсээтилэр.
Холобур, Хаҥалас улууһун “Дьөһөгөй” диэн сылгы иитэр хаһаайыстыбаҕа, сылгылары нэһилиэнньэлээх пууннартан ыраах күрүөлээх сиргэ иитэр авторскай ньымалаахтар эбит.
“Саха сиригэр маннык ньыманан үлэлиир хаһаайыстыба ахсааннаах буолуохтаах. Инньэ гынан, бу ньыманы тарҕатыахха наада”, — диэн Денис Белозеров кэпсиир.
“Дьөһөгөй” хаһаайыстыба эдэр салайааччыта Вячеслав Нестеров сылгыны иитиигэ саҥа атын ньымаларын кэпсээтэ. 2015 сылтан төбө ахсаанын 70-тан 1050 диэри элбэппиттэр. Ону таһынан, бу хаһаайыстыба үлэ миэстэтин таһаарар. Ол курдук, үс учаастакка үлэһиттэргэ аналлаах аныгы дьиэ-уот тутуллубут. Төгүрүк сыл итиинэн, уотунан-күөһүнэн хааччыллар.
“Биһиги сүрүн сыалбыт диэн, сылгы ахсаанын элбэтии уонна үлэһиттэргэ сөптөөх усулуобуйаны тэрийии буолар”, – диэн Вячеслав Нестеров кэпсиир.
Форумҥа фермердэр, бааһынай хаһаайыстыбалар уонна тыа сирин кооперацияларын бэрэстэбиитэллэрэ, муниципальнай тэриллиилэр баһылыктара, уопсайа 150 тахса киһи кыттар.
